Ebanghelyo: Lc 9: 43b-45
Nang lubos na nagtataka ang lahat dahil sa mga ginagawa ni Jesus, sinabi ni Jesus sa kanyang mga alagad: “Itanim ninyong mabuti sa inyong pandinig ang mga kataga kong ito: ibibigay ang Anak ng Tao sa kamay ng mga tao.” Hindi nila naintindihan ang pahayag na ito at nalingid ito sa kanila upang hindi nila maunawaan. At takot naman silang magtanong sa kanya tungkol sa pahayag na ito.
Pagninilay
Kung seseryosohin natin, napakahirap maging magulang at magpalaki ng anak na magiging responsable at magkakaroon ng halaga hindi lamang sa simbahan pati na rin sa lipunan. Habang lumalaki ang anak o mga anak, isa sa pangunahing gawain ng mabuting magulang ay ang mapalaki at mapatapos ang anak o mga anak na maging responsable sa lahat ng kani-kanilang mga aksyon, pagpili, at pagpapasya sa buhay, at harapin ang maaring kahihinatnan ng mga ito. Kinakailangang mapalaki ang bata na marunong umako sa mga maling nagawang kasalanan, at kailanman ay lumaki ng hindi naninisi ng ibang tao para sa mga kapalpakan at di kanais-nais na nangyari sa buhay. Sabi nga sa Eclesiastes 11: 9, “sundin ang gusto mo at tuparin ang iyong mga pangarap ngunit alalahaning hahatulan ng Diyos ang lahat ng ginagawa mo.” Habang maaga pa, ang bawat tao ay kailangan ang tulong at gabay ng magulang, na maging responsable at may pananagutan sa magiging kahihinatnan ng kani-kanilang aksyon, pagpili, at pagpapasya. Ang bawat isa ay biniyayaan ng sapat na talino, kakayahan, at kalayaan upang mamuhay na may pananagutan sa iba at higit sa lahat sa dakilang Diyos na nagbigay ng buhay.
© Copyright Pang Araw-Araw 2024