Ebanghelyo: Lc 9: 7-9
Nabalitaan naman ng tetrarkang si Herodes ang lahat ng pangyayaring ito at litung-lito siya dahil may nagsasabing nabuhay mula sa mga patay si Juan. Sinabi naman ng iba na nagpakita si Elias, at ng iba pa na isa sa mga propeta noon ang bumangon. At sinabi ni Herodes: “Pinapugutan ko si Juan; sino nga kaya itong nababalitaan kong gumagawa ng mga iyon?” Kaya sinikap niyang makita siya.
Pagninilay
I sang guro na nagtuturo sa pampublikong paaralan ang naglabas ng kanyang hinaing sa nararanasang paghihirap sa pagpila sa mga pampublikong sasakyan, mula sa kanyang tinitirhan patungong paaralan at
pabalik sa tahanan, pagkatapos ng ilang oras na sunod-sunod na pagtuturo at pangangasiwa sa ugali at pagkatuto ng kanyang mga mag-aaral. Sa kagustuhang makatulong sa kanyang pamilya, minarapat niyang lisanin ang pribadong paaralan at makipagsapalaran sa mas malaking sahod na alok ng pamahalaan sa mga guro ng estado. Sa paglipas ng panahon, napagtanto niya na maaring siya ay nagkamali sa pagpapasyang lumipat. Nawala ang saysay sa araw-araw niyang pagpapakahirap upang magawa ang napakaraming tungkulin bilang guro at makatanggap ng sweldo na bumubuhay sa kanyang pamilya. Minsan ay natanong niya sa kanyang sarili, “para kanino nga ba siya bumabangon araw-araw?” Sa Libro ng Eclesiastes 1:2-11, mababasa natin ito, “Walang katuturan ang lahat – sabi ng Guro – walang katuturan! Ano ang pakinabang ng tao sa lahat ng gawang pinaghirapan niya sa ilalim ng araw? … walang bago sa ilalim ng araw.” Ang buhay ng tao na hiwalay sa tawag at kalooban ng Diyos ay tiyak na mawawalan ng kahulugan, kahalagahan, at kabuluhan. Nawa’y matuto tayong kumapit ng mahigpit sa dakilang Diyos upang maging makabuluhan ang pagpupunyagi natin sa hamon ng buhay.
© Copyright Pang Araw-Araw 2024