Ebanghelyo: Mc 9: 30-37
Umalis sila roon at nagsimulang dumaan sa Galilea. Gusto niya na walang sinumang makaalam sapagkat tinuturuan niya ang kanyang mga alagad. At sinabi niya sa kanila: “Ibibigay ang Anak ng Tao sa kamay ng mga tao. Papatayin nila siya ngunit pagkapatay nila sa kanya, babangon siya sa ikatlong araw.” Kaya lubha silang nalungkot. Hindi nila ito naintindihan at hindi rin sila nangahas magtanong sa kanya. Pagdating nila sa Capernaum, nang nasa bahay na siya, tinanong niya sila: “Ano ang pinag-uusapan ninyo sa daan?” At hindi sila umimik; pinagtatalunan nga nila sa daan kung sino ang mas una. Kaya naupo siya at pagkatawag saa Labindalawa ay sinabi sa kanila: “Kung may gustong mauna, maging huli siya sa lahat at lingkod ng lahat.” At pagkakuha niya sa isang maliit na bata, pinatayo ito sa gitna nila at inakbayan at saka sinabi sa kanila: “Ang sinumang tumanggap sa isa sa mga batang ito nang dahil sa aking pangalan ay tumatanggap sa akin. At ang tumatanggap sa akin ay hindi ako ang tinatanggap kundi ang nagsugo sa akin.”
Pagninilay
May pagkakataon sa buhay natin na kung minsan ay hindi tayo lubos na nauunawaan ng mga taong dapat na nakikinig sa atin. Sila’y abala sa ibang bagay, o may ibang iniisip, kaya hindi maintindihan kung ano nga ba ang ating sinasabi, kinikwento, o ibinabahagi. Ito ay sadyang nakakabigo at nakakawala ng gana. Sa ebanghelyo, halatang-halata na hindi lubusan ang pagkaunawa ng mga alagad sa sinasabi ni Jesus tungkol sa Kanyang parating na paghihirap at kamatayan. Sa kabila ng pagsasalaysay Niya sa matinding pagsubok na Kanyang daranasin, iba ang mas importante para sa mga alagad Niya. Mas pinahalagahan nilang malaman kung sino ang mauuna sa kanila sa Kaharian ng Diyos. Ika nga, may kakaibang
agenda silang pinagkakaabalahan at nakatuon sa kanilang mga sarili.
Dahil dito, hindi na nagsayang ng panahon si Jesus upang turuan sila, lalo na sa pagtingin ng tama kung sino para sa Diyos ang mas mahalaga at nauuna. Tinatawag Niya tayo na matutong magpakumbaba kagaya ng isang maliit na bata at magkaroon ng dalisay na puso tulad ng Mahal na Birheng Maria. Ipadala nawa ng Diyos ang Kanyang Banal na Espiritu upang mabuskan ang ating mga “tainga” at madinig ang tunay na boses ng nag-iisang Diyos.
© Copyright Pang Araw-Araw 2024