Ebanghelyo: Lc 7: 36-50*
(…) Ngayon, may isang babae sa bayang iyon na itinuturing na makasalanan. Nang malaman nitong si Jesus ay nasa hapag sa bahay ng Pariseo, nagdala ito ng pabangong nasa sisidlang alabastro. Tumayo siya sa likuran, sa may paanan ni Jesus at umiyak. Tumulo ang kanyang mga luha sa mga paa ni Jesus at pinunasan niya ng kanyang buhok, at hinagkan at
pinahiran ng pabango. Nang makita ito ng Pariseong kumumbida sa kanya, naisip nito: “Kung propeta ang taong ito, at anong uri ng tao ang humipo sa kanya – isa ka ngang makasalanan!“ Ngunit nagsalita sa kanya si Jesus: “Simon, may sasabihin ako sa iyo.“ Sumagot ito: “Guro, magsalita ka.“ At sinabi niya: “May dalawang may utang sa isang taong nagpapautang. Limandaang salaping pilak ang utang ng isa at limampu naman ang sa isa pa. Ngunit wala silang maibayad kaya kapwa niya sila pinatawad. Ngayon, sino sa kanila ang magmamahal sa kanya nang higit?“ Sumagot si Simon: “Sa palagay ko’y ang pinatawad niya ng mas malaki.“ At sinabi sa kanya ni Jesus: “Tama ang hatol mo.“ At paglingon niya sa babae, sinabi niya kay Simon: “Nakikita mo ba ang babaeng ito? (…)
Pagninilay
Kasama sa malaking ideya (Big Ideas) sa pamamahayag ni Jesus ay ang paksa o tema ng pag-ibig, pagpapatawad sa kasalanan, at kapayapaan. Ang tatlong ito ay magkaugnay at may kinalaman sa Kaharian ng Diyos. Dahil sa turo ni Jesus na ang Diyos ay pag-ibig, lahat ng Kanyang anak sa Ngalan ni Jesus ay tinatawag magmahal sa iisang Diyos ng higit sa lahat, at magmahal sa kapwa gaya ng pagmamahal sa sarili. Bilang mapagmahal na Diyos, ang habag at awa Niya sa lahat ng mga nagsisising makasalanang nilalang ang nag-udyok ng kapatawaran. Kapayapaan naman ang tiyak na mararanasan ng isang taong nakaranas ng pag-ibig at kapatawaran ng Diyos. Kung pagdudugtong-dugtungin, maaari nating sabihin na tayong lahat ay nilikha ng mapagmahal na Diyos upang matutunan natin Siyang mahalin ng buo nating puso, isip, at kaluluwa. Dahil sa ating kahinaan bilang Kanyang nilalang, tayo ay nagkakasala at nangangailangan ng habag, awa, at pagpapatawad ng Diyos. Ang biyayang kaloob Niya ng kapatawaran ay nakapagbibigay sa ating buhay ng tunay na kapayapaan at kapanatagan ng loob. Tunay ngang mapalad ang taong may kapayapaan sa kanyang puso at kaluluwa.
© Copyright Pang Araw-Araw 2024