Ebanghelyo: Lc 5: 1-11*
(…) Sinabi niya kay Simon: “Pumalaot ka at ihulog ninyo ang inyong mga lambat para humuli.” Ngunit sumagot si Simon: “Guro, buong magdamag kaming nagpagod at wala kaming nakuha pero dahil sinabi mo, ihuhulog ko ang mga lambat.” At nang gawin nila ito, nakahuli sila ng napakaraming isda kaya halos mag-kandasira ang kanilang mga lambat. Kaya kinawayan nila ang kanilang mga kasamahang nasa kabilang bangka para lumapit at tulungan sila. Dumating nga ang mga ito at pinuno nila ang dalawang bangka hanggang halos lumubog ang mga iyon. Nang makita ito ni Simon Pedro, nagpatirapa siya sa harap ni Jesus at sinabi: “Lumayo ka sa akin, Panginoon, sapagkat taong makasalanan lamang ako.” Talaga ngang nasindak siya at ang lahat niyang kasama dahil sa huli ng mga isda na nakuha nila. Gayundin naman ang mga anak ni Zebedeo na sina Jaime at Juan na mga kasama ni Simon. Ngunit sinabi ni Jesus kay Simon: “Huwag kang matakot; mula ngayo’y mga tao ang huhulihin mo.” Kayat nang madala na nila ang mga bangka sa lupa, iniwan nila ang lahat at sumunod sa kanya.
Pagninilay
Napakahalaga sa ating panahon ngayon ang ebidensya. Ito ang nagsisilbing patunay na ang isang bagay ay tunay na naganap at hindi kathang isip o gawa-gawa lamang. Kung maihahalintulad noong unang panahon, mas napakadali ngayon ng gawaing dokumentasyon sa mga pangyayari, gaya halimbawa ng aksidente sa kalsada, iba’t-ibang uri ng krimen, at mga kalamidad. Busog na busog ang mga may siyentipikong pag-iisip na “ang makita ay ang maniwala” (to see is to believe) dahil sa tulong ng pag-unlad ng teknolohiya, madali ng irecord ang mga kaganapan sa mundo. Sa larangan ng pananampalataya, hindi nagiba ang tawag ng Diyos sa bawat tao na “maniwala ka at makikita mo” (believe and you will see). Iba ang pagkakasunod-sunod ng kilos sa ating pakikitungo at pakikipagtipan sa Diyos. Hangad Niya na tayo ay manalig at maniwala muna sa Kanya upang maganap ang mga himala sa ating buhay. Ito ang mabuting ginawa ni San Pedro ayon sa ebanghelyo. Kahit na siya ang may karanasan sa pangingisda, nagtiwala at sinunod niya si Jesus na anak ng isang karpintero. Ang “dahil sinabi mo, ihuhulog ko ang mga lambat” ay pagpapatunay na naganap ang himala dahil nauna ang pananalig ni San Pedro sa kapangyarihan ng Panginoon.
© Copyright Pang Araw-Araw 2024