Ebanghelyo: Lc 12: 8-12
Sinasabi ko sa inyo: sinumang kumilala sa akin sa harap ng mga tao ay kikilalanin din ng Anak ng Tao sa harap ng mga anghel ng Diyos. At ang ayaw kumilala sa akin sa harap ng mga tao’y hindi rin kikilalanin sa harap ng mga anghel ng Diyos. Ang sinumang magsalita laban sa Anak ng Tao ay mapapatawad, ngunit ang sinumang lumait sa Espiritu Santo ay hindi mapapatawad. Dalhin man nila kayo sa harap ng mga sinagoga at mga namumuno at mga maykapangyarihan, huwag kayong mabalisa kung paano ninyo ipagtatanggol ang sarili o kung ano ang inyong sasabihin. Sapagkat ang Espiritu Santo ang magtuturo sa inyo sa oras na iyon ng dapat na sabihin.“
Pagninilay
Sa ebanghelyo, tinuturuan ni Jesus ang mga disipulo tungkol sa kahalagahan ng paggalaw ng Banal na Espiritu sa kanilang buhay. Kaya naman tila masasabi natin na may hangganan ang pagpapatawad ng Diyos, sapagkat may kasalanan na hindi napapatawad. Pinaalalahanan sila ni Jesus na ang paglait sa Espiritu ng Diyos ay hindi mapapatawad. Sa Ingles, ang salitang ginamit ay blaspheme o paglapastangan, na isang pagtanggi sa kabanalan o pagtanggi sa presensya ng Espiritu ng Pag-ibig. Sa madaling salita, hindi pagtanggap sa pagmamahal ng Diyos Ama at Anak. Hindi maaabot kahit gaano pa kalaki ang pagmamahal ng Diyos ang sino man na nagpasyang tumalikod sa Kanyang pagmamahal. Gayun pa man, susubukin pa rin ng Diyos na magpadala ng sugo upang tayo ay hanapin. Sinumang tatanggap sa Espiritu ay magkakaroon ng kalinawagan at kapayapaan kahit pa siya ay hindi karapat-dapat.
© Copyright Pang Araw-araw 2024