Ebanghelyo: Lc 11: 27-28
Habang nagsasalita pa siya, isang babae mula sa dami ng tao ang malakas na nagsabi sa kanya: “Mapalad ang nagdala sa iyo sa kanyang sinapupunan at nagpasuso sa iyo.“ Ngunit sumagot si Jesus: “Kaya talagang mapalad ang mga nakikinig sa salita ng Diyos at tumutupad nito.“
Pagninilay
Ang mga nakinig kay Jesus ay manghangmangha sa kanyang turo at kapangyarihan. Hindi nila mapigilang isipin din ang kanyang Ina na si Maria, na nagsilang sa Kanya. Tunay ngang pinagpala ang Inang Maria, na siyang napiling maging ina ni Jesus. Ang tugon naman ni Jesus, talagang mapapalad ang mga nakikinig sa Salita ng Diyos. Ang Mahal na Birheng Maria ay nakinig at tinanggap ang salita ng Diyos sa kanyang puso. Tunay na siya nga ay pinagpala ng Diyos. Tulad ng winika ni San Pablo, ang pakikinig kay Jesus ay nagdadala ng pananampalataya sa Kanya. Ang pananampalataya na ito ay nagdadala naman sa atin sa pagpapala na ibinigay sa angkan ni Abraham. Mahalagang laging bukas ang mga tenga ng ating puso sa pakikinig kay Jesus.
© Copyright Pang Araw-Araw 2024