Ebanghelyo: Lc 11: 5-13
Sinabi rin sa kanila ni Jesus: “Ipalagay nating may kaibigan ang isa sa inyo at pinuntahan mo siya sa hatinggabi at sinabi: ‘Kaibigan, pahiram nga ng tatlong pirasong tinapay dahil kararating lang mula sa biyahe ng isa kong kaibigan at wala akong maihain sa kanya.’ At sasagutin ka siguro ng nasa loob: ‘Huwag mo na akong gambalain. Nakatrangka na ang pinto at nakahiga na kami ng mga bata; hindi na ako maaaring tumayo para bigyan ka.’ Sinasabi ko sa inyo, kung hindi man siya bumangon para magbigay dahil sa pakikipagkaibigan, babangon pa rin siya at ibibigay sa iyo ang lahat mong kailangan dahil sa pagpupumilit sa kanya. Kaya sinasabi ko sa inyo: humingi at kayo’y bibigyan, maghanap at matatagpuan ninyo, kumatok at bubuksan ang pinto para sa inyo. Talaga ngang tumatanggap ang humihingi, nakakatagpo ang naghahanap at pinagbubuksan ang kumakatok. Sino sa inyo ang amang magbibigay ng ahas sa kanyang anak kung isda at hindi ahas ang hinihingi nito? Sino ang magbibigay ng alakdan kung itlog ang hinihingi? Kaya kung kayo mang masasama’y marunong magbigay ng mabubuting kaloob sa inyong mga anak, gaano pa kaya ang Ama mula sa langit? Tiyak na ibibigay niya ang banal na Espiritu sa mga hihingi sa kanya.“
Pagninilay
Ang buhay natin ay tulad ng isang pagsunod. Kung sino ang ating sinusundan, siya ang tutukoy nang ating kahahantungan. Sa unang pagbasa pinuna ni San Pablo ang mga taga-Galasya. Sino nga ba ang sinusunod nila? Sino mang sumusunod sa Diyos ay ginagabayan ng Diyos ng kanyang Espiritu. Ang espiritu ay ibibigay Niya sa sino mang humiling nito. Tulad nang parabulang ibinahagi ni Jesus, Siya ay babangon upang ibigay at ipagkaloob sa atin ang espiritu. Hindi natin makikita and daan patungo sa Diyos kung wala ang espiritung gagabay sa ating buhay. Hilingin natin sa Panginoon ang kanyang Espiritu at ito’y Kanyang ipagkakaloob sa atin.
Nang sa gayon, tayo ay tunay na makasunod sa Kanya.
© Copyright Pang Araw-Araw 2024