Ebanghelyo: Lc 11: 1-4
Isang araw, nananalangin si Jesus sa isang lugar at pagkatapos niya’y sinabi sa kanya ng isa sa kanyang mga alagad: “Panginoon, turuan mo kaming manalangin kung paanong tinuruan ni Juan ang kanyang mga alagad.“ At sinabi ni Jesus sa kanila: “Kung mananalangin kayo, sabihin ninyo: Ama, sambahin ang ngalan mo, dumating ang kaharian mo, bigyan mo kami arawaraw ng pagkaing kailangang-kailangan namin, patawarin mo kami sa aming mga sala; tingnan mo’t pinatatawad din namin ang lahat ng may utang sa amin, at huwag mo kaming dalhin sa tukso.“
Pagninilay
Kung ano man ang natanggap sa Diyos – pagpapala, kaalaman o paraan ng pagdarasal – ito ay mga biyaya mula sa Kanya. Ang mga biyaya ng Diyos na ibinabahagi sa atin ay walang anumang kapalit at ipinagkakaloob kahit pa tayo’y di karapatdapat para dito. Tulad ng pagbabahagi na ito, ano man ang ating natanggap ay nararapat din nating ibigay at ibahagi sa kapwa. Sa unang pagbasa, si San Pablo at ang kanyang mga kasamahan ay ibinahagi ang salita ng Diyos upang ito ay maipahayag sa lahat. Si Jesus ay ibinahagi rin sa kanyang mga alagad ang paraan ng kanyang pagdarasal at pakikipagugnayan sa Ama upang sila ay lubos na makasunod sa Kanya. Sa ating buhay, mainam na ibahagi rin natin ang anumang biyayang ating natatanggap sa ating kapwa. Nang sa gayon, sila rin ay makaharap sa Diyos na lumikha ng lahat nang higit na may pagtangi. Kapag tayo ay nagbabahagi ng ating mga natatanggap na pagpapala ay mas nagiging kalugod-lugod tayo sa mata ng Diyos.
© Copyright Pang Araw-Araw 2024