Ebanghelyo: Mc 10: 2-16
At lumapit ang ilang Pariseo na gusto siyang subukan at tinanong nila siya: “Pinahihintulutan bang diborsiyuhin ng lalaki ang kanyang asawa sa anumang dahilan?“ Itinanong naman niya: “Ano ang iniutos sa inyo ni Moises?“ At sinabi nila: “Ipinahintulot ni Moises na paalisin ang babae pagkabigay sa kanya ng kasulatan ng diborsiyo.“ Sinabi naman ni Jesus sa kanila: “Alam ni Moises na matigas ang inyong puso kaya sinulat niya ang kautusang ito. Ngunit sa simula’y ginawa sila ng Maykapal na lalaki at babae, at dahil dito, iiwan ng lalaki ang kanyang ama at ina at magiging iisang katawan ang dalawa. Kung gayo’y hindi na sila dalawa kundi iisang katawan lamang kaya huwag paghiwalayin ng tao ang pinagbuklod ng Diyos.“ Nang nasa bahay na sila, tinanong siyang muli ng mga alagad. At sinabi niya sa kanila: “Kung may lalaking magpaalis sa kanyang asawa at saka magpakasal sa iba, nakiapid na siya. At kung ang babae naman ang magpaalis sa lalaki at magpakasal sa iba, nakikiapid din siya.“ May nagdala naman kay Jesus ng mga bata para hipuin niya sila. Ngunit pinagalitan ng mga alagad ang mga taong may dala sa kanila. At pagkakita ni Jesus, nagalit siya at sinabi sa kanila: “Pabayaan ninyong lumapit sa akin ang mga bata. Huwag ninyo silang pigilan. Sa mga tulad nga nila ang kaharian ng Diyos. Talagang sinasabi ko sa inyo: hindi papasok sa kaharian ng Diyos ang di tumatanggap dito gaya ng isang maliit na bata.“ At pagkakalong sa kanila ni Jesus, ipinatong niya sa kanila ang kanyang mga kamay para basbasan sila.
Pagninilay
Si Adan ay nilikha ni Yawe-Diyos mula sa lupa. Si Eba, kahit na may kakayahan ang Diyos na likhain din mula sa lupa, ay nagmula sa tadyang ni Adan. Marahil, nais ng Diyos na tularan natin ang kanyang puso kung paano niya tayo minahal. Tayong lahat ay nagmula sa iisang Adan at Eba, buto ng aking buto, laman ng aking laman. Dahil dito, tayo ay nilikha upang makipagtipan sa isa’t-isa at tanggapin at mahalin ang bawat isa. Sa ebanghelyo, hindi sinang-ayunan ni Jesus ang pahihiwalay ng mag-asawa dahil ito ay ang kabiguan ng pakikipagtipan sa isa’tisa at pagsunod sa puso ng Diyos. Sila’y pinagbuklod ng Diyos. Hindi rin kayang tanggapin ni Jesus na pabayaan ang mga bata sapagkat ito rin ay kabiguan ng pagsunod sa Ama na Lumikha. Iniutos Niya na tanggapin ang mga bata ng lubusan. Marahil sa mata ng tao sila ay walang silbi, ngunit sa mata ng Diyos sila ang pinakamahalaga at nauuna sa Kanyang Kaharian. Nagsisimula sa pamilya ang daan patungo sa Diyos. Kung hindi natin ito magagampanan, hindi rin natin ito magagawa sa iba o kahit sa harapan ng Diyos. Ang Diyos ay naririyan sa ating mga tahanan at ang pagsunod sa puso ng Diyos ang siyang paraan ng pagiging tunay Niyang anak.
© Copyright Pang Araw-Araw 2024