Ebanghelyo: Lucas 19:1-10
Pumasok si Jesus sa Jerico at dumaan sa siyudad. At may isang taong nagngangalang Zakeo. Pinuno Siya ng mga kolektor ng buwis at napakayaman. Sinikap Niyang makita kung sino si Jesus pero pandak Siya at hindi Niya magawa dahil sa dami ng mga tao. Kaya patakbo siyang umuna at umakyat sa isang punong-malaigos para makita si Jesus pagdaan doon. Pagdating ni Jesus sa lugar na iyon, tumingala Siya at sinabi sa Kanya: “Zakeo, bumaba ka agad. Sa bahay mo nga ako dapat tumigil ngayon.” Nagmamadali siyang bumaba at tuwang-tuwang tinanggap si Jesus. Inireklamo naman sa isa’t-isa ng lahat ng nakakita rito: “Sa bahay ng isang lalaking makasalanan Siya nakituloy.” Ngunit tumayo si Zakeo at sinabi sa Panginoon: “Panginoon, ibibigay ko sa mga dukha ang kalahati ng aking mga ari-arian; at kung may nadaya ako, apat na beses ko siyang babayaran.” At sinabi sa Kanya ni Jesus: “Dumating ngayon ang kaligtasan sa sambahayang ito dahil anak nga ni Abraham ang taong ito. At dumating ang Anak ng Tao para hanapin at iligtas ang nawawala.”Pagninilay
Ang bahaging ito ng Ebanghelyo tungkol sa pagtatagpo ni Jesus at Zakeo ang siyang ginagamit sa pagbebendisyon ng isang bahay. “Zakeo, bumaba ka agad. Sa bahay mo nga ako dapat tumigil ngayon.” Ito ang paanyaya ni Jesus kay Zakeo at ito rin ang Kanyang panawagan sa ating lahat. Hahanapin tayo ng Panginoon saan man tayo naroroon upang manahan Siya sa ating tahanan. Kung nasaan ang ating mga puso, naroroon ang ating tahanan. Minsan tayo’y nagtatago, umiiwas at nahihiya dahil sa ating mga kasalanan. Ngunit sa kabila ng lahat, ang ating kagustuhang muling masilayan si Jesus ang magdadala sa atin upang muli Niya tayong matagpuan. At kapag muli tayong pinuntahan at matagpuan sa ating mga tahanan, handa ba tayong magbago gaya ni Zakeo?© Copyright Pang Araw-Araw 2019