Ebanghelyo: Juan 15:18-21
Kung napopoot sa inyo ang mundo, alamin n’yo na sa akin muna ito napoot bago sa inyo. Kung kayo’y makamundo, inibig na sana ng mundo ang sariling kanya. Ngunit dahil hindi kayo makamundo kundi hinirang ko kayo mula sa mundo kaya napopoot sa inyo ang mundo. Tandaan ninyo ang salitang sinabi ko sa inyo: ‘Walang lingkod na mas dakila sa kanyang panginoon.’ Di ba’t inusig nila ako? Uusigin din kayo. Tinupad ba nila ang aking salita? Gayon din nila tutuparin ang sa inyo. Gagawin nila sa inyo ang lahat ng ito dahil sa aking pangalan sapagkat hindi nila nakikilala ang nagpadala sa akin.
Pagninilay
Ang pagsunod sa Panginoon ay hindi madali. Marami tayong mga pagsubok na haharapin at mararanasan sa mundo. Ngunit winika ni Jesus na huwag tayong mangamba o panghinaan ng loob, kung napopoot man sa atin ang mundo. Sa kanya muna ito napoot bago sa atin. Tandaan na tayo ay daraan lamang sa mundong ibabaw. Hindi ito ang ating tunay na tahanan at tayo ay pansamantala lamang na maninirahan dito. Kaya huwag tayong mag-alala kung ang mundo man ay napopoot sa atin. Ang ating layunin ay ang makabalik sa ating tahanan kung saan naroroon ang Diyos Ama. Ito ay ating makakamit kung tayo’y susunod kay Jesus. Dapat tayong maging handa na maranasan kung ano man ang kanyang mga naranasan. Ito ay ang magiging daan upang makabalik tayo sa ating tunay na tahanan sa langit, kung nasaan ang Ama.
© Copyright Pang Araw-Araw 2020
