Mas Gusto Ko ang Pasko ng Pagkabuhay

Pagkaraan ng Pasko tila ba

umurong lang nang konti ang mga

kuko ng mapagsamantala at

unti-unti silang hahaba pa.

 

Ang mga may-ari ng simbahan

naka-ismid pa rin sa likod ng

kangitian nila kanina lang

naka-uniporme pa sila nyan.

 

Ang mga nagbibigay ng payo

iba naman ang pakikitungo

sa hindi nila kapwa miyembro

mga taga-gilid lang paano.

 

Paluhod silang mananalangin

ang dibdib makatlong tatapikin

labas-masok pa sa sakristiya

may pagtsitsika bago ang Misa.

 

Sila ang laging may karapatang

pumuna sa mga kamaliang

hindi sinasadya, nagmadali,

nagkamali o nakalimutan.

 

Mas mainam kaya sa simbahan

kung ang ipakita sa mismong krus

ay yaong nagpahirap kay Hesus

kasama kong walang karapatan.

 

Upang bago ibaba ang tala

yakap ko ang mensahe ni Kristo

hindi pagsilang kundi ang Kanyang

pagpanaw – ang ating katubusan.

ABRAHAM DE LA TORRE