Ebanghelyo: Lucas 1:26-38
Sa ikanim na buwan, isinugo ng Diyos ang Anghel Gabriel sa isang bayan ng Galilea na tinatawag na Nazaret. Sinugo ito sa isang birhen na ipinagkasundo na sa isang lalaking nagngangalang Jose mula sa sambahayan ni David; at Maria naman ang pangalan ng birhen.
Pumasok ang anghel at sinabi sa Kanya: “Matuwa ka, O puspos ng grasya, sumasaiyo ang Panginoon.” Nabagabag naman si Maria dahil sa pananalitang ito at pinagwari kung ano ang pagbating ito.
At sinabi ng anghel sa Kanya: “Huwag kang matakot, Maria, dahil may magandang niloloob ang Diyos para sa iyo. At ngayo’y maglilihi ka at manganganak ng isang lalaki na pangangalanan mong Jesus. Magiging dakila Siya at tatawagin siyang Anak ng Kataas-taasan, at ibibigay sa Kanya ng Panginoong Diyos ang trono ng Kanyang ninunong si David.
Maghahari Siya sa angkan ni Jacob magpakailanman; talaga ngang walang katapusan ang Kanyang paghahari.”
Sinabi ni Maria sa anghel: “Paanong mangyayari ito gayong di ako ginagalaw ng lalaki?” At sumagot sa Kanya ang anghel: “Papanaog sa iyo ang Espiritu Santo at lililiman ka ng kapangyarihan ng Kataas-taasan kaya magiging banal ang isisilang at tatawaging Anak ng Diyos. At nagdalantao naman ngayon ang pinsan mong si Elizabeth sa kabila ng Kanyang katandaan, at siyang itinuturing na baog ay nasa ikaanim na buwan na. Wala ngang imposible sa Diyos.”
Sinabi naman ni Maria: “Narito ang utusan ng Panginoon, mangyari nawa sa akin ang iyong sinabi.” At nilisan Siya ng anghel.
Pagninilay
Hindi kita mahihindian.” Ito ang karanasan natin sa isang taong lubos ang kabutihan kung kaya’t walang dahilan upang ating tanggihan. Si Maria sa simula’t simula pa lamang ay napuspos na ng Espiritu Santo. Namumuhay siyang lubos na pinakikinggan ang kalooban ng Diyos at sa tuwina’y nasa presensya ng Panginoon. Kung kaya’t nang dumating ang dakilang mensaheng dala ni Arkanghel Gabriel, si Maria ay nagpaubaya at nagtiwalang mangyayari sa kanya ang kalooban ng Diyos. Bagama’t natatakot at nagugulumihanan at hindi lubos na nauunawaan ang lahat ng kaganapan, patuloy pa rin siyang nagtiwala. Tanging ang taong namumuhay at namamalagi sa kabanalan ang makatutugon ng “Oo” sa Panginoon. Paano natin mahihindian ang Diyos?
© Copyright Pang Araw-Araw 2021
