Ebanghelyo: Juan 5:1-16
Umahon pa-Jerusalem si Jesus. May isang palanguyan sa Jerusalem na Betzata ang tawag sa Hebreo, malapit sa Pintuan ng mga Tupa. May limang pasilyo ito na may bubong. Nakahandusay sa mga ito ang isang pulutong ng mga maysakit, mga bulag, mga pilay at mga lumpo (habang naghihintay sa pagkilos ng tubig. At doo’y may taong tatlumpu’t walong taon nang may sakit.
Pagkakita ni Jesus dito na nakahandusay at pagkaalam niya na matagal na ito roon, sinabi niya sa kanya: “Gusto mo bang umigi?” Sumagot sa kanya ang maysakit: “Wala po akong taong makapaghahagis sa akin sa palanguyan kapag nakalawkaw na ang tubig. Habang paroon pa ako, may lumulusong nang una sa akin.”
Sinabi sa kanya ni Jesus: “Bumangon ka, buhatin mo ang iyong higaan at maglakad-lakad!” At dagling umigi ang tao, at binuhat niya ang kanyang higaan at naglakad-lakad.
Araw nga ng Pahinga ang araw na iyon. Kaya sinabi ng mga Judio sa taong pinagaling: “Araw ng Pahinga ngayon at di ipinahihintulot na magbuhat ka ng higaan. Sumagot siya sa kanila: “Ang nagpaigi sa akin ang siyang nagsabi sa aking “Buhatin mo ang iyong higaan at lumakad ka.” Tinanong nila siya: “Sino ang taong nagsabi sa iyong ‘Magbuhat at maglakad-lakad?” Ngunit hindi alam ng pinagaling kung sino siya, sapagkat nakatalilis si Jesus dahil maraming tao sa lugar na iyon.
Pagkatapos nito, natagpuan siya ni Jesus sa Templo at sinabi niya sa kanya: “Hayan, maigi ka na. Huwag ka nang magkasala pa, at baka may masahol pang mangyari sa iyo.” Umalis ang tao at sinabi sa mga Judio na si Jesus ang nagpaigi sa kanya. Dahil dito, inusig ng mga Judio si Jesus sapagkat sa Araw ng Pahinga niya ginawa ang mga ito.
Pagninilay
Hindi biro ang tatlumpu’t walong taong pagkakahandusay sa sakit. Mahabang panahon na umaasa siya sa kanyang paggaling mula sa karamdaman. Sa pag-aakalang ang palanguyan sa may templo ang makapagpapagaling sa kanya, umaasa na lamang siya na balang araw ay may magdadala sa kanya rito. Minsan ay naghahanap tayo ng ating kagalingan sa hindi tamang lugar. Kahit ano na lamang ang ating pinapaniwalaan na inaakala nating maghahatid sa atin ng biyaya, swerte, pagkakataon at kung anu-ano pa. Ilang beses na nga ba tayong umasa sa kung anuanong ritwal na binibigyang katuwiran na “wala namang mawawala kung maniniwala.” Pero sa katotohanan, hindi ritwal sa templo o ang Araw ng Pahinga ang magbibigay ng kagalingan sa atin kundi ang presensya ni Jesus. Sa Kanya tayo manalig. Sa Kanya lamang.
© Copyright Pang Araw-Araw 2021
