Ebanghelyo: Lucas 16:19-31
May isang mayaman na nakabihis ng magarang damit at pinong linen at parang piyesta ang kanyang buhay sa araw-araw. Nakahandusay naman sa may pintuan niya ang isang dukhang nagngangalang Lazaro. Tadtad siya ng mga sugat at gusto sana niyang kainin ang mumong nahuhulog sa hapag ng mayaman; sa halip ay mga aso ang lumalapit sa kanya at hinihimuran ang kanyang mga sugat. At namatay ang dukha at dinala siya ng mga anghel sa piling ni Abraham. Namatay rin naman ang mayaman at inilibing. Nang nasa impiyerno na siya, tumingala siya sa kanyang pagdurusa at natanaw sa malayo si Abraham at si Lazaro sa piling nito. Kaya sumigaw siya: ‘Amang Abraham, maawa ka sa akin at utusan mo naman si Lazaro na isawsaw niya sa tubig ang dulo ng kanyang daliri para paginhawahin ang aking dila dahil lubha akong naghihirap sa lagablab na ito.’
Sumagot si Abraham: ‘Anak, alalahanin mong tinanggap mo na sa buhay mo ang mabuti sa iyo at kay Lazaro naman ang masasama. Kaya siya ngayon ang nasa ginhawa at ikaw ang nagdurusa. At isa pa’y malawak na kabundukang di matatawid ang itinakda sa pagitan natin. Kaya hindi makatatawid ang mga may gustong pumunta riyan galing dito, at hindi rin naman makatatawid ang mula riyan papunta rito.’
Sumagot ang mayaman: ‘Kaya ipinakikiusap ko sa iyo, Ama, na papuntahin mo si Lazaro sa bahay ng aking ama, kung saan naroon ang lima kong kapatid para babalaan sila upang di sila mapunta sa lugar na ito ng pagdurusa.’ Sumagot si Abraham: ‘Nasa kanila si Moises at ang mga propeta, makinig sila sa mga ito.’ Sinabi niya: ‘Hindi gayon, Amang Abraham; kung isa sa mga patay ang pupunta sa kanila, magsisisi sila.’
Sinabi ni Abraham: ‘Kung hindi nila pakikinggan si Moises at ang mga propeta, bumangon man ang isa sa mga patay ay hindi pa rin sila maniniwala’.”
Pagninilay
Tila kabundukang hindi matatawid ang malawak na itinakdang pagitan ng mayamang nasa impiyerno at ni Lazaro na kapiling ni Abraham sapagkat gayundin ang ginawa nilang pagitan noong sila’y nabubuhay pa. Malayo ang nilikhang agwat ng mayaman at mahirap. Bagama’t nasa may pintuan lamang si Lazaro araw-araw, hindi ito napapansin o piniling hindi pansinin ng mayaman upang matulungan. Hindi mahirap isalarawan ang mga tulad ni Lazaro. Patuloy silang namumuhay sa ating lipunan: ang mga mahihirap na walang tahanan, ang mga batang palaboy sa kalye, ang mga matatandang iniwanan, ang mga may sakit na hindi tanggapin sa pagamutan. Maging mulat nawa tayo sa pangangailangan ng iba at gawing malapit ang pagitang naghihiwalay sa kanila. “Tumulong ang Diyos” ang kahulugan ng ngalang Lazaro. Tayo rin nawa.
© Copyright Pang Araw-Araw 2021
