Ebanghelyo: Mateo 25:31-46
Pagdating ng Anak ng Tao sa Kanyang Kaluwalhatian kasama ng lahat Niyang mga anghel, uupo Siya sa maluwalhati Niyang trono. Dadalhin sa harap Niya ang lahat ng bansa at parang isang pastol na inihihiwalay ang
mga tupa sa mga kambing, gayundin Niya paghihiwahiwalayin ang mga tao. Ilalagay Niya ang mga tupa sa kanan Niya at ang mga kambing sa kaliwa. Sasabihin ng Hari sa mga nasa kanan Niya: ‘Halikayo, pinagpala ng aking Ama! Manahin ninyo ang kahariang inihanda para sa inyo mula pa sa simula ng daigdig. Sapagkat nagutom ako at inyong pinakain, nauhaw ako at inyong pinainom. Naging dayuhan ako at pinatuloy ninyo ako. Nang ako’y hubad, dinamitan ninyo ako; nang maysakit ako, binisita ninyo ako. Nang ako’y nasa bilangguan, dinalaw ninyo ako.’ At itatanong sa Kanya ng mabubuti: ‘Panginoon, kailan ka namin nakitang nagugutom at pinakain, nauuhaw at pinainom, isang dayuhan at pinatuloy, at walang suot at dinamitan? Kailan ka namin nakitang maysakit o nasa bilangguan at nilapitan?’ Sasagutin sila ng Hari: ‘Talagang sinasabi ko sa inyo: anuman ang gawin ninyo sa isa sa maliliit na ito na mga kapatid ko, sa akin ninyo ginawa.’ Pagkatapos ay sasabihin naman Niya sa mga nasa kaliwa Niya: ‘Mga isinumpa, lumayas kayo sa harap ko tungo sa apoy na walang katapusan na inihanda para sa diyablo at sa mga anghel nito! Sapagkat nagutom ako at di ninyo binigyan ng makakain, nauhaw at di ninyo
pinainom, naging dayuhan ako at di ninyo pinatuloy, maysakit at nasa bilangguan at di ninyo binisita.’ Kaya itatanong din nila: ‘Panginoon, kailan ka namin nakitang nagugutom, nauuhaw, dayuhan, hubad, maysakit o nakabilanggo, at di ka namin pinaglingkuran?’ Sasagutin sila ng Hari: ‘Talagang sinasabi ko sa inyo: anuman ang di ninyo ginawa sa isa sa maliliit na ito, hindi ninyo ginawa sa akin.’ At pupunta ang mga ito sa walang hanggang parusa, ngunit sa walang hanggang buhay naman ang mga makatarungan.”
Pagninilay
Napakagandang isipin na ang Diyos mismo ang nagbigay ng mga gabay kung papaano mabuhay na kawangis niya. Hindi na tayo mahihirapan pang gumawa ng sarili nating mga gabay sapagka’t natukoy na ng Diyos sa Lumang Tipan ang mga dapat nating iwasan. Sa Bagong Tipan naman, sinabi ni Jesus na ang batayan ng ating pagpasok sa kanyang kaharian ay kung ano ang mga kawanggawa na ginawa natin noong tayo ay nabubuhay pa. Samakatuwid hindi ang kayamanan, ari-arian, mga diplomang nalikom, mga posisyon ang magliligtas sa atin kung ang mga ito ay ginamit sa pag aalipusta at panlilinliang sa kapwa. Hahanapan tayo ng pakikipagkapwa- tao, kung tayo ba ay nagpakain sa mga nagugutom, nagpainom sa mga nauuhaw, nakipaglibing, nagbahagi ng pangangailangan ng mga inaapi, nagpasilong sa mga walang masilungan. Ang kayamanan palang hinahangad ng marami ay iba sa kayamanang hahanapin ng Diyos sa atin pagdating ng hukom. Ikaw, anong kayamanan ang meron ka?
© Copyright Pang Araw-Araw 2020