Ebanghelyo: Mateo 15:29-37
Umalis doon si Jesus at pumunta sa pampang ng lawa ng Galilea, at pagkaakyat sa burol ay naupo. Maraming tao ang lumapit sa kanya, dala-dala ang mga pipi, bulag, pilay, mga may kapansanan, at mga taong may iba’t ibang karamdaman. Inilagay sila ng mga tao sa paanan ni Jesus, at pinagaling niya sila. Kaya namangha ang lahat nang makita nilang nagsasalita ang mga pipi, lumalakad ang mga pilay, gumagaling ang mga may kapansanan at nakakakita ang mga bulag; kaya pinuri nila ang Diyos ng Israel. Tinawag ni Jesus ang kanyang mga alagad at sinabi sa kanila: “Labis akong naaawa sa mga taong ito, pangatlong araw ko na silang kasama at wala na silang makain. Ayaw kong paalisin silang gutom at baka mahilo sila sa daan.” Sinabi ng mga alagad sa kanya: “At saan naman tayo hahanap ng sapat na tinapay sa ilang na ito para ipakain sa mga taong iyan?” Sinabi ni Jesus sa kanila: “Ilan bang tinapay meron kayo?” Sumagot sila: “Pito, at kaunting maliliit na isda.” Pinaupo ni Jesus sa lupa ang mga tao, kinuha niya ang pitong tinapay at ang maliliit na isda, at nagpasalamat sa Diyos. Hinati-hati niya ang mga ito at ibinigay sa kanyang mga alagad, at ibinigay rin nila sa mga tao. Kumain silang lahat at nabusog at inipon ang mga natirang pira-piraso – pitong punong bayong.
Pagninilay
Ayon sa pagsusuri, 11.3% ng populasyon sa mundo ay gutom o halos 805 milyong mga tao na nagkukulang ng sapat na pagkain upang mabuhay nang malusog. Ngunit may sapat na pagkain ang mundo para sa lahat ng 7 bilyong tao. Ang kahirapan ang pangunahing dahilan ng kagutuman at ang lubhang hindi pantay na pamamahagi ng kita sa mundo. Ito ang paanyaya sa atin ni Jesus, ang maging bahagi ng solusyon sa pamamagitan ng pagbibigay o pagbabahagi ng ating mga biyaya sa ating kapwa. Nawa´y matuto tayong magbahagi kung ano man ang mayroon tayo nang sa gayon ay mawala ang kagutuman sa mundo. Harinawa.
© Copyright Pang Araw-Araw 2020
