Ebanghelyo: Mateo 23:1-12
Sinabi ni Jesus sa mga tao at sa kanyang mga alagad: “Ang mga guro ng Batas at mga Pariseo ang umupo sa puwesto ni Moises. Pakinggan at gawin ang lahat nilang sinasabi pero huwag silang pamarisan, sapagkat nagsasalita sila pero hindi naman ginagawa. Naghahanda sila ng mabibigat na pasanin at ipinapatong sa mga balikat ng mga tao. Ngunit hindi nila ikinikilos ni isang daliri para galawin ang mga iyon. Pakitang-tao lamang ang lahat nilang ginagawa; dahil dito, malalapad na laso ng Kasulatan ang gusto nila para sa kanilang noo, at mahahabang palawit sa kanilang balabal. Gusto nilang mabigyan ng pangunahing lugar o upuan sa mga piging at sa sinagoga. Ikinatutuwa rin nilang mabati sa mga liwasan at matawag na guro ng mga tao. “Huwag kayong patawag na guro sapagkat iisa lamang ang Guro ninyo at magkakapatid kayong lahat. Huwag din ninyong tawaging ama ang sinuman sa mundo sapagkat iisa lamang ang inyong Ama, siya na nasa Langit. Huwag din kayong patawag na gabay sapagkat iisa lamang ang inyong Patnubay, si Kristo. Maging alipin ninyo ang pinakadakila sa inyo. Sapagkat ibababa ang nagpapakataas at itataas ang nagpapakababa.”
Pagninilay
Itinalaga ni Papa Pio XII noong 1954 ang Kapistahan ng Pagkareyna ng ating Mahal na Ina, upang bigyang diin ang tungkulin ni Maria sa kaharian ng kanyang anak. Sa pamamagitan ng kanyang pagpapakumbaba at pananatiling alipin ng Panginoon, tumulong siya sa kaligtasang itinanghal ni Jesus sa mundo. Ipinagdiriwang ang kapistahan pitong araw makatapos ang pagakyat ni Maria sa kalangitan, ayon sa pinagninilayan natin sa mga Misteryo ng Luwalhati, kung saan iniakyat siya sa langit at kinoronahan siyang reyna ng buong mundo. Katulad ni Maria, meron din tayong kayang ibahagi para sa kaharian ni Jesus kung mananatili tayong alipin ng Diyos, iaakyat din tayo sa langit at babahaginan tayo ng Diyos ng kanyang kaluwalhatian. Maging modelo’t gabay natin si Maria.
© Copyright Pang Araw-Araw 2020
