Ebanghelyo: Lucas 1:39-56
Nang mga araw ring iyo’y nagmamadaling naglakbay si Maria papunta sa isang bayan sa mataas na lupain ng Juda. Pumasok siya roon sa bahay ni Zacarias at binati si Elizabeth. Nang marinig ni Elizabeth ang bati ni Maria, sumikad ang sanggol sa sinapupunan niya, at napuspos ng Espiritu Santo si Elizabeth at malakas siyang sumigaw at sinabi: “Lubos kang pinagpala sa mga kababaihan. Pinagpala rin ang bunga ng iyong sinapupunan! Sino nga ba naman ako’t naparito sa akin ang ina ng aking Panginoon? Nang umabot sa aking pandinig ang iyong pagbati, sumikad sa tuwa ang sanggol sa aking sinapupunan. Pinagpapala ang naniniwalang magaganap ang mga sinabi sa kanya ng Panginoon.” At sinabi ni Maria: “Dinadakila ng aking kaluluwa ang Pangi noon at nagagalak ang aking espiritu sa Diyos na aking Tagapagligtas dahil isinaalangalang niya ang abang utusan niya, at mula ngayon, ituturing akong mapalad ng lahat ng salinlahi. Dakila nga ang ginawa sa akin ng Makapangyarihan, banal ang kanyang Pangalan. Patuloy ang kanyang awa sa mga sali’t salinlahi para sa mga may pitagan sa kanya. Ipinakita niya ang lakas ng kanyang bisig, ipinagtabuyan ang mga taong may mapagmataas na balak. Pinatalsik niya sa luklukan ang mga makapangyarihan, itinampok naman ang mga balewala. Binusog niya ng mabubuting bagay ang mga nagugutom at itinaboy namang walangwala ang mayayaman. Nilingap niya ang Israel na kanyang lingkod, inalaala ang kanyang awa ayon sa ipinangako niya sa ating mga ninuno, kay Abraham at sa kanyang angkan magpakailanman.” Mga tatlong buwang nanatili si Mariang kasama ni Elizabeth at saka nagbalik sa kanyang bahay.
Pagninilay
“Ang kaligtasan ay nariyan kasama ng kapangyarihan at paghahari ng Diyos mula sa sugo sa hinirang.” Ang mga salitang ito sa aklat ng Pagpapahayag ay naganap sa pamamagitan ng isang dalagang pinili ng Diyos na nanganak sa sabsaban at naging Ina ng kanyang bugtong na Anak, ang Manliligtas. Si Maria ang sukatan sa ating mga natututunan upang maging marapat sa Kaharian sa langit. Ang Panginoon ang lumikha kay Maria na isang payak at masunurin. Mula sa ating mga panalangin kay Santa Maria, humingi tayo nang biyayang kalooban ng Diyos upang maging karapatdapat pumasok sa kanyang kaharian.
© Copyright Pang Araw-Araw 2023