Ebanghelyo: Mt 14: 13-21
Nang marinig ito ni Jesus, lumayo siya at namangka na sila-sila lang patungo sa ilang na lugar. Ngunit nalaman ito ng mga tao at sumunod sila sa kanya na naglalakad mula sa kanilang mga bayan. Pagdating ni Jesus sa pampang, nakita niya ang maraming taong nagkakatipon doon at naawa siya sa kanila. At pinagaling niya ang mga maysakit. Nang hapon na, lumapit sa kanya ang mga alagad at sinabi: “Nasa ilang na lugar tayo at lampas na ang oras. Paalisin mo na ang maraming taong ito para makapunta sila sa mga nayon at makabili ng kanikanilang pagkain.” Ngunit sumagot si Jesus: “Hindi na nila kailangang umalis pa; kayo ang magbigay sa kanila ng makakain.” Sinabi nila: “Wala kami rito kundi limang tinapay at dalawang isda.” Sinabi niya: “Akin na.” At iniutos niyang maupo sa damuhan ang makapal na tao. Kinuha niya ang limang tinapay at dalawang isda, tumingala sa langit, nagpuri, hinati ang mga tinapay at ibinigay sa kanyang mga alagad; at ibinigay rin nila sa mga tao. At kumain silang lahat at nabusog, at inipon nila ang mga natirang pira-piraso – labindalawang punong basket. Mga limanlibong lalaki ang napakain bukod pa sa mga babae at mga bata.
Pagninilay
Sa Unang Pagbasa, makikita natin ang malaking pagkakaiba
ng isang tunay na propeta ng Diyos sa isang propetang huwad. Ang isang propetang nagngangalang Ananias ay naninilbihan na isang propeta sa ilalim ng pamumuno ni Haring Sedekios ng Judah. Sa gitna ng mga hindi kanais-nais na mga karanasan ng mga Judio dahil sa pagsakop ng pwersa ng Babylonia sa kanilang lupain, si Ananias ay nagpapahayag ng maling pag-asa at pangako na may kasamang pagtingin sa kinabukasan na isang panahon ng kasaganaan na muling mararanasan ng bansang Israel. Ang kanyang mensahe ay masarap sa pandinig. Ang isang huwad na propeta kagaya ni Ananias ay nagbibigay ng salita na gustong marinig ng tao sapagkat siya ay may pakinabang sa ganitong kalakaran at maisasakatuparan niya ang pansarili o personal na agenda niya habang naglilingkod sa hari. Ang huwad na propeta na ito ay walang takot na hinarap ni Jeremias, isang tunay na propeta ng Diyos. Isiniwalat niya ang panlilinlang ni Ananias at ipinahayag niya na ayon sa Salita ng Diyos mas titindi pa ang pamatok ng bansang Israel at patuloy pa silang makakaranas ng pagsubok dahil sila ay nagkasala at nakalimot sa kanilang ugnayan sa Diyos.
© Copyright Pang Araw-Araw 2024