Abril 11, 2023

Ebanghelyo: Juan 20:11-18

Nakatayo namang umiiyak sa labas si Maria sa may libingan. Sa kanyang pag-iyak, yumuko siyang nakatanaw sa libingan. At may napansin siyang dalawang anghel na nakaputi na nakaupo, isa sa may ulunan at isa sa may paanan ng pinaglagyan sa katawan ni Jesus.

Sinabi sa kanya ng mga iyon: “Ale, bakit ka umiiyak?” Sinabi niya sa kanila: “May kumuha sa Panginoon ko, at hindi ko alam kung saan siya inilagay.” Pagkasabi niya nito, tumalikod siya at napansin niya si Jesus na nakatayo pero hindi niya nakilalang si Jesus iyon.

Sinabi sa kanya ni Jesus: “Ale, bakit ka umiiyak? Sino’ng hinahanap mo?” Sa pag-aakala niyang iyon ang hardinero, sinabi niya sa kanya: “Ginoo, kung kayo ang nagdala sa kanya, sabihin n’yo sa akin kung saan n’yo siya inilagay at kukunin ko siya.”

Sinabi sa kanya ni Jesus: “Maria!” Pagkaharap niya’y sinabi niya sa kanya sa Aramaiko: “Rabbouni!” (na ibig sabihi’y Guro). Sinabi sa kanya ni Jesus: “Huwag kang humawak sa akin sapagkat hindi pa ako nakaaakyat sa Ama. Puntahan mo ang mga kapatid ko at sabihin sa kanila: ‘Paakyat ako sa Ama ko at Ama ninyo, sa Diyos ko at Diyos ninyo.’”

Pumunta si Maria Magdalena na ibinabalita sa mga alagad: “Nakita ko ang Panginoon.” At sinabi niya ang mga sinabi sa kanya.”

Pagninilay

Kung mabalitaan natin na ang isang kapitbahay ay namatay at muling nabuhay sa ikatlong araw, hindi tayo agad-agad maniniwala. Isa itong normal na reaksyon. Ito rin ang nangyari sa mga nakarinig ng balita na muling nabuhay si Jesus, gaya ni Maria Magdalena na patuloy sa pag-iyak sa labas ng libingan ni Jesus. Dahil sa mga luha mula sa kanyang mga mata, hindi niya agad nakilala si Jesus na nangungusap sa kanya. Sa ating mga karanasan ng kalungkutan at kahirapan, may mga panahon na umiiyak tayo at hindi agad makilala ang presensya ni Jesus na kasama natin tuwina. Ang ating pananalig sa muling pagkabuhay ni Jesus ay patuloy na nagpapaalala sa atin na ang lahat ng pighati ay lilipas sapagkat ibinabahagi sa atin ni Jesus ang biyaya ng kanyang muling pagkabuhay.

© Copyright Pang Araw-Araw 2023