Ebanghelyo: Lc 11: 47-54
Sawimpalad kayong nagtatayo ng mga puntod sa mga propetang pinatay ng inyong mga ama. Sa gayon ninyo inaamin at sinasang-ayunan ang mga ginawa ng inyong mga ama; iniligpit nila ang mga propeta, at makapagtatayo na kayo ngayon. (Sinabi rin ng Karunungan ng Diyos:) Nagsusugo ako sa kanila ng mga propeta at mga apostol ngunit uusigin nila at papatayin ang ilan sa kanila. Kayat papapanagutin ang salinlahing ito sa dugo ng lahat ng propeta, sa dugong nabuhos mula pa sa pagkatatag ng mundo, mula sa dugo ni Abel hanggang sa dugo ni Zacarias na nasawi sa pagitan ng altar at ng santuwaryo. Oo, sinasabi ko sa inyo, papapanagutin ang salinlahing ito. Sawimpalad kayong mga guro ng Batas na umagaw sa susi ng kaalaman. Hindi na kayo pumasok at hinadlangan pa ninyo ang mga makapapasok.“ Pagkatapos ay umalis si Jesus at sinimulan naman ng mga guro ng Batas at mga Pariseo na mahigpit na makipagtalo sa kanya. Pinapagsalita nila siya tungkol sa maraming bagay at pilit na sinisilo sa anumang sinasabi niya.
Pagninilay
Kung minsan, nasusuklian ng kasamaan ang isang makabuluhang pagpupuna. Sa ebanghelyo, pinuna ni Jesus ang mga gawain at paraan ng mga Eskriba at mga Pariseo. Tinawag sila ni Jesus na mga sawinpalad, marahil sa kadahilanang ang kanilang mga palad ay hindi naaayon sa palad ng Diyos. Upang tayo ay umayon sa palad ng Diyos, kailangang buksan natin ang mga palad natin sa pagtanggap ng mga pagpapala ng Diyos. Ang mga pagpuna, bagamat maaaring makasakit sa ating kalooban at makasugat sa ating sarili o “ego”, ay maaaring may magandang layunin at kabutihan na naguugat sa pagmamahal at maaaring magdala ng mabuting kapalaran. Kinakailangan lang nating maging bukas sa paggalaw ng biyaya at pagpapala ng Diyos sa ating buhay
© Copyright Pang Araw-araw 2024