Ebanghelyo: Lc 11: 37-41
Matapos magsalita si Jesus, inanyayahan siya ng isang Pariseo na kumain sa bahay nito. Pumasok siya at dumulog sa hapag. At nagtaka ang Pariseo nang makitang hindi muna siya naghugas ng kamay bago kumain. Ngunit sinabi sa kanya ng Panginoon: “Kayong mga Pariseo, ugali ninyong linisin ang labas ng mga baso’t pinggan pero nag-uumapaw naman sa kasakiman at kasamaan ang inyong loob! Mga hangal! Di ba’t ang maygawa ng labas ang siya ring maygawa ng loob? Pero naglilimos lamang kayo at sa akala ninyo’y malinis na ang lahat.
Pagninilay
A ng ating mga reaksyon o pagtugon sa buhay ay nakabatay sa ating kamalayaan at karanasan. Kung napapansin natin ito, mas napanghahawakan natin ang ating reaksyon o tugon. Sa ebanghelyo, ang hindi paghuhugas ni Jesus ng kanyang kamay ay isang pagkakataon para turuan ng isang makabuluhang aral ang mga Pariseo. Ito’y upang mabatid nila ang kanilang napakalaking pagkukulang para makasunod at maging matuwid sa harap ng Diyos. Ano nga ba ang mas mainam, ang malinis na mga kamay o ang malinis na puso’t isipan? Ang mga Pariseo ay mas nagpapahalaga at nakatuon sa mga panlabas na kilos at gawi, imbes na tutukan nila ang kabutihan at kalinisan ng kanilang kalooban. Tayo rin naman ay inaanyayahan at hinahamon ni Jesus na magkaroon ng pagninilay at kamalayan sa bawat pagtugon natin sa buhay. Nang sa gayon, mas makasunod tayo kay Jesus nang may malinis na puso’t isipan.
© Copyright Pang Araw-araw 2024