Ebanghelyo: Lc 10: 38-42
Sa kanilang paglalakbay, pumasok si Jesus sa isang nayon at pinatuloy siya ng isang babaeng nagngangalang Marta. May kapatid siyang babae na tinatawag na Maria. Naupo ito sa may paanan ng Panginoon at nakikinig sa kanyang salita. Abalang-abala naman si Marta sa mga pagsisilbi kaya lumapit siya at sinabi: “Panginoon, hindi mo ba napapansing pinabayaan ako ng aking kapatid na babae na magsilbing mag-isa? Pakisabi mo naman sa kanya na tulungan ako.“ Sumagot sa kanya ang Panginoon: “Marta, Marta, abala ka’t balisa sa maraming bagay; isa lang naman ang kailangan. Pinili nga ni Maria ang mainam na bahagi na hindi kukunin sa kanya.“
Pagninilay
Winika ni San Pablo sa unang pagbasa na siya’y ibinukod na ng Diyos bago pa man siya isinilang upang ipahayag ang Kanyang salita. Ito ay bunga ng pagmamahal ng Diyos. Walang buhay sa mundo na Kanyang pinapayagan na manatili ng walang dahilan at Kanyang pagpapala. Nararapat lamang na tayo rin ay maglaan ng panahon upang ang Diyos ay pakinggan. Sa ebanghelyo, hindi maituturing na masama ang pagsisilbing ginawa ni Marta. Gayun pa man, sa panahon na iyon na nagtuturo at nagsasalita si Jesus, kung saan ipinapahayag Niya ang mga salitang nagbibigay-buhay,
kinakailangang maglaan ng panahon sa pakikinig. Wala na ngang mas mainam pa, kundi ang mapakinggan ang mga salita ni Jesus na nagbibigay-buhay. Ito nga ang mas pinili ni Maria.
© Copyright Pang Araw-Araw 2024