Ebanghelyo: Lc 8: 16-18
Walang nagsisindi ng ilawan at tinatakpan ito ng palayok o inilalagay sa ilalim ng higaan. Ipinapatong ito sa patungan para makita ng mga pumapasok ang liwanag. Walang nalilihim na di mabubunyag ni natatakpan na di mahahayag at malalantad. Kayat isip-isipin ninyo ang inyong naririnig dahil bibigyan pa nga ang mayroon at ang walang-wala naman, kahit na ang akala niyang kanya, ay aagawin sa kanya.”
Pagninilay
Bilang mga alagad ng Panginoong JesuKristo, tayo ay tinatawag at hinahamon na maging “asin at ilaw” ng mundo. Sa tamang timpla, at sa kaalaman ng magaling na tagaluto, ang asin ay hindi lamang nakakatulong sa pagkain para hindi agad mabulok, ito rin ay nagbibigay ng dagdag na lasa at sarap sa mga kinakain ng tao. Kung paiiralin natin ang tunay na diwa ng kababaangloob at kagandahang-loob, at pagmamahalang ayon sa turo ni Jesus, makatitiyak tayo na mas magiging “may lasa” ang buhay ng mga taong makakahalubilo natin. Tayo ay makapagbibigay liwanag at pag-asa sa mundong napupuno ng kadiliman, karahasan, at kasalanan. Kung bubuksan natin ang buo nating puso, isip, kaluluwa, at pagkatao sa pag-ibig ng Diyos, at sa taglay Niyang liwanag, bawat isa ay magniningning sa kabutihan at liwanag. Ayaw ng Diyos na tayo ay maging masama at malayo sa Kanyang kapanatilihan. Nais Niyang mamuhay tayo sa mundo bilang mga anak Niya sa Ngalan ni Jesus, at ipalaganap ang pag-ibig, kapayapaan, at kapatawaran ng kasalanan sa mga taong higit na nangangailangan nito. Nawa’y sumaatin ang Banal na Espiritu upang tayo ay maging ganap na “asin at liwanag” ng sanlibutan.
© Copyright Pang Araw-Araw 2024