Ebanghelyo: Mt 9: 9-13
Sa paglalakad ni Jesus, nakita niya ang isang lalaking nagngangalang Mateo na nakaupo sa singilan ng buwis at sinabi niya rito: “Sumunod ka sa akin.” At tumayo si Mateo at sinundan siya. At habang nasa hapag si Jesus sa bahay ni Mateo, maraming tagasingil ng buwis at iba pang makasalanan ang lumapit at nakisalo kay Jesus at sa kanyang mga alagad. Nang makita ito ng mga Pariseo, tinanong nila ang kanyang mga alagad: “Bakit kumakaing kasama ng mga makasalanan at maniningil ng buwis ang inyong guro?” Nang marinig ito ni Jesus, sinabi niya: “Hindi ang malulusog ang nangangailangan ng doktor kundi ang mga maysakit! Sige, matutuhan sana ninyo ang kahulugan ng ‘Awa ang gusto ko, hindi handog.’ Hindi ako pumarito para tawagin ang mabubuti kundi ang mga makasalanan.”
Pagninilay
Si Jesus ay sadyang naiiba at kakaiba sa maraming aspeto kung maihahalintulad sa mga tao noong Siya ay nabuhay dito sa mundo. Bilang “rabboni” (Hebreo ng salitang guro), ibang-iba ang pamamaraan Niya. Noon, ang mga disipulo ang naghahanap ng kanilang guro, samantalang si Jesus mismo ang naghanap at nag-anyaya ng Kanyang mga disipulo. Kakaiba rin ang pakikipag-ugnayan ni Jesus sa Kanyang mga piniling disipulo. Higit pa sa pagiging mag-aaral lang ang hinahanap Niya. Siya ay nag-anyaya ng mga tao na susundan ang mga turo Niya at ang Kanyang pamumuhay. Siya ay naghahanap ng mga “sugo” o mga apostol na magpapatuloy sa pagpapahayag ng ebanghelyo. Kakaiba rin ang pamamaraan ng pagpili ni Jesus ng mga alagad. Ang halimbawa nito ay noong tinawag Niya at anyayahang sumunod sa Kanya si San Mateo, na kilalang makasalanan sa komunidad ng mga Hudyo. Siya ay taga singil ng buwis sa kanyang kapwa Hudyo kapalit ng pagiging sakop ng bayang Israel sa kapangyarihan ng Roma. Walang pakialam si Jesus sa panghuhusga ng iba sa pagpili niya ng Kanyang mga alagad. Siya ay nakatingin sa puso ng sinumang nagnanais mabigyan ng pagkakataong magbagong-buhay.
© Copyright Pang Araw-Araw 2024