Ebanghelyo: Mt 16: 13-23*
Pumunta noon si Jesus sa may dakong Cesarea ni Filipo. Tinanong niya ang kanyang mga alagad: “Ano ang Anak ng Tao para sa mga tao? Sino ako para sa kanila?” Sumagot sila: “May nagsasabing si Juan Bautista ka; may iba pang nagsasabing si Elias ka o si Jeremias o isa sa mga propeta kaya.” Sinabi niya sa kanila: “Ngunit sino ako para sa inyo?” At sumagot si Simon Pedro: “Ikaw ang Mesiyas, ang Anak ng Diyos na Buhay.” Sumagot naman si Jesus: “Mapalad ka, Simon Bar-Yona, hindi nga laman at dugo ang nagbunyag nito sa iyo kundi ang aking Amang nasa Langit. At ngayon sinasabi ko sa iyo: Ikaw si Pedro (o Bato) at sa batong ito ko itatayo ang aking Iglesya; at hindinghindi ito madadaig ng kapangyarihan ng kamatayan. Ibibigay ko sa iyo ang mga susi ng kaharian ng Langit: ang itali mo dito sa lupa ay itatali rin sa Langit, at ang kalagan mo dito sa lupa ay kakalagan din sa Langit.” At inutusan niya ang kanyang mga alagad na huwag sabihin kanino man na siya nga ang Mesiyas. (…) (…) Dinala naman siya ni Pedro sa isang tabi at sinimulang pagsabihan: “Huwag sana, Panginoon! Hindi ito puwede.” Ngunit hinarap ni Jesus si Pedro at sinabi sa kanya: “Sa likod ko, Satanas! At baka mo pa ako tisurin. Hindi sa Diyos galing ang iyong iniisip kundi mula sa tao.
Pagninilay
Sa pagsasalin sa Filipino ng ebanghelyo ni San Mateo 16:13-23, mapapansin natin na ang unang tanong ni Jesus ay nagsimula sa salitang “Ano…?” Matapos itong masagot ng mga alagad, sinundan ito ng mas malalim na tanong na nagpapamalas kung gaano Siya tunay na kakilala ng Kanyang mga alagad, “Ngunit sino ako…?” Magkaiba ang antas ng kaalaman o pagkakakilanlan sa tao. Mainam na maunawaan natin na hindi magkapantay ang “knowing about the person” at “knowing the person.” Mas madalas na marami tayong alam at masasabi sa isang taong sikat o popular gaya ng isang artista, subalit hindi ito pagpapatunay na kilalangkilala natin siya sa personal na antas. Sabi nga ng mga bihasang mga pilosopo at sikologo, “it takes a lifetime to really know a person.” Ito marahil ang dahilan kaya pinagtibay ni Jesus na ang pagkilala ni Simon Pedro na Siya ay “ang Anak ng Diyos” at ito’y galing sa Diyos Ama at hindi sa anumang karanasan at pagkakakilala ni Pedro bilang alagad at kasama ni Jesus. Gaya ng ipinangako ni Yahweh kay Jeremias (31:31- 34) ang pagkilala ni Pedro kay Jesus bilang Mesiyas ay isang kaalamang inilagay ng Diyos sa puso ng alagad. Ito ay kaalaman ibinunyag ng Diyos at hindi nadiskubre ng tao.
© Copyright Pang Araw-Araw 2024