Ebanghelyo: Mateo 21:33-43
Makinig kayo sa isa pang halimbawa: May isang may-ari ng bahay na nagtanim ng ubasan; binakuran ang paligid nito, humukay para sa pisaan ng ubas, at nagtayo ng toreng bantayan. Pinaupahan niya ang ubasan sa mga magsasaka at naglakbay sa malayo. Nang malapit na ang panahon ng anihan, pinapunta ng may-ari ang kanyang mga katulong sa mga magsasaka para kubrahin ang kanyang bahagi sa ani. Ngunit sinunggaban ng mga magsasaka ang kanyang mga katulong, binugbog ang isa, pinatay ang iba at binato ang ilan. Nagpadala uli ang may-ari ng marami pang katulong pero ganoon din ang ginawa ng mga magsasaka sa kanila. Sa bandang huli, ipinadala na rin niya ang kanyang anak sa pag-aakalang ‘Igagalang nila ang aking anak.’ Ngunit nang makita ng mga magsasaka ang anak, inisip nilang ‘Ito ang tagapagmana. Patayin natin siya at mapapasaatin ang kanyang mana.’ Kaya sinunggaban nila siya, at pinalayas sa ubasan at pinatay. Ngayon, pagdating ng may-ari ng ubasan, ano ang gagawin niya sa mga magsasaka?” Sinabi nila sa kanya: “Hindi niya kaaawaan ang masasamang taong iyon; pupuksain niya ang mga iyon at pauupahan ang ubasan sa ibang magsasakang magbibigay ng kanyang kaparte sa anihan.” At sumagot si Jesus: “Hindi ba ninyo nabasa sa Kasulatan? ‘Naging panulukang bato ang tinanggihan ng mga tagapagtayo. Gawa ito ng Panginoon; at kahanga-hanga ang ating nakita.’Kaya sinasabi ko sa inyo: aagawin sa inyo ang kaharian ng Diyos at ibibigay sa isang bayang makapagpapalago nito.
Pagninilay
Ipinahahayag sa talinhagang ito na ang Diyos ang may-ari ng ubasan na nagpapaupa sa kanyang ari-arian sa mga lider ng relihiyon ng Israel. Hindi lamang nila tinanggihan ang mga propeta, pinatay pa nila ang anak na kumakatawan kay Jesus. Tayo’y inaanyayahan na tanungin din ang ating sarili: Ano ang sinasabi nito tungkol sa aking mga gusot na relasyon sa pamilya, mga kaibigan, at kasamahan? Ano ang itinuturo nito tungkol sa aking kakayahan na magpatawad sa iba at sa aking sarili? Paano nga ba ako tutugon sa walang hanggang kahabagan at kabutihan na iniaalok sa akin ng Diyos sa bawat araw?
© Copyright Pang Araw-Araw 2020
