Nobyembre 23, 2019

Ebanghelyo: Lucas 20:27-40
Lumapit noon ang ilang Sadduseo na mga taong tutol sa pagkabuhay. At itinanong nila kay Jesus: “Guro, isinulat ni Moises para sa amin: ‘Kung may magkakapatid na lalaki at mamatay na walang anak ang isa sa kanila, kailangang kunin ng Kanyang kapatid ang Kanyang asawa para magpasibol ng supling sa Kanyang kapatid.’ Ngayon, may pitong magkakapatid na lalaki. Nag-asawa ang panganay at namatay na walang anak. Kinuha ng pangalawa ang biyuda, at pagkatapos ay ng pangatlo naman, pero hindi nagkaanak ang pito. Namatay sila at sa bandang huli’y namatay rin ang babae. Sa pagkabuhay, kanino sa pito Siya maituturing na asawa? Ang pito nga ang umangkin sa Kanya.” Sinagot sila ni Jesus: “Nag-aasawa ang mga taong nasa daigdig na ito, lalaki man o babae. Ngunit hindi na mag-aasawa ang mga ituturing na karapat-dapat sa kabilang-buhay at sa pagkabuhay ng mga patay, lalaki man o babae. Hindi na nga sila mamamatay. Kapantay na sila ng mga anghel at mga anak sila ng Diyos matapos silang ibangon. Tiyak na may pagkabuhay ng mga patay; ipinahiwatig ito kahit na ni Moises sa kabanata ng palumpong nang tawagin Niyang Diyos ni Abraham, Diyos ni Isaac at Diyos ni Jacob ang Panginoon. Hindi Siya Diyos ng mga patay kundi ng mga buhay, at buhay na kasama Niya silang lahat.” Nagsalita ang ilang guro ng Batas: “Guro, talaga ngang tama ang iyong sinabi.” Mula noo’y wala nang nangahas na magtanong pa sa Kanya.

Pagninilay
Ginagapi ng Liwanag ng Muling Pagkabuhay ang kadiliman ng kamatayan. Ang ating Diyos ay Diyos ng mga buhày at hindi ng mga patay. Ang katotohanang ito ay mahirap paniwalaan para sa mga Saduseyo. Si Kristo mismo ang nagpapatunay, sa Kanyang mga salita at gawa, na ang Diyos ay Diyos ng buhày. Kung tayo’y tunay na mga anak ng Diyos, tayo rin ay mga anak ng bùhay. Mainam na suriin ang ating kapaligiran. Tayo ba ay nagsisilbing taga-alaga at tagapagtanggol ng buhay? Maka-buhay ang nagtataguyod ng katotohanan, kapayapaan, katarungan, kaunlaran, pangangalaga sa kalikasan, dignidad ng sangkatauhan at iba pang pagpapahalaga na lumilinang dito. Halina’t maging bahagi ng kultura ng buhay sa halip na lumikha ng kultura ng kamatayan.

© Copyright Pang Araw-Araw 2019