Oktubre 31, 2019

Ebanghelyo: Lucas 13:31-35
Nang sandaling iyo’y dumating ang ilang Pariseo at binalaan siya: “Umalis ka rito at pumunta sa ibang lugar. Gusto kang ipapatay ni Herodes.” Sinabi naman ni Jesus: “Puntahan ninyo ang musang na ’yon at sabihin sa Kanya: ‘Ngayon at bukas ay nagpapalayas ako ng mga demonyo at nagpapagaling at nasa ikatlong araw ang katapusan ko.’ Subalit dapat akong maglakad ngayon, bukas at sa susunod na araw sapagkat hindi bagay na mamatay sa labas ng Jerusalem ang isang propeta. Jerusalem, Jerusalem! Pinapatay mo ang mga propeta at binabato ang mga sinugo sa iyo. Gaano kadalas kong ginustong tipunin ang iyong mga anak gaya ng pagyupyop ng inahin sa Kanyang mga sisiw pero tumanggi ka nga. Ngayon, iiwanan ang inyong Bahay. Sinasabi ko nga sa inyo na hindi na ninyo ako makikita hanggang di sumasapit ang panahon na sabihin ninyo: Mapalad ang dumarating sa ngalan ng Panginoon.”

Pagninilay
Lahat ng paraan ay kayang gawin ng isang inahin upang lingapin at ipagtanggol ang Kanyang mga sisiw laban sa mga nagnanais na kunin ang mga ito. Inihalintulad ni Jesus ang Kanyang sarili sa isang inahin na tinitipon ang Kanyang mga sisiw sa ilalim ng Kanyang mga pakpak. “Gaano kadalas kong ginustong tipunin ang iyong mga anak gaya ng pagyupyop ng inahin sa Kanyang mga sisiw.” Hindi ba’t tayo’y ligtas sa anumang kapahamakan kung nananatili tayo sa ilalim ng Kanyang lilim? Subalit minsan, katulad ng mga Pariseo, umiiwas tayong matipon at mapailalim sa Kanya at sa halip ay hinahayaang lumapit sa kasamaan. Gaya rin ba tayo ng Jerusalem na tumanggi sa paglingap ng inahin? O handa tayong sumailalim sa kapangyarihan ni Jesus?

© Copyright Pang Araw-Araw 2019