Ebanghelyo: Juan 3:13-17
“Walang umakyat sa langit maliban sa bumaba mula sa langit – ang Anak ng Tao.
At kung paanong itinaas ni Moises ang ahas sa disyerto, gayundin dapat itaas ang Anak ng Tao upang magkaroon ng buhay magpakailanman ang bawat nananalig sa kanya.
Ganito nga kamahal ng Diyos ang mundo! Kayat ibinigay niya ang kanyang bugtong na anak upang hindi na mawala ang bawat nananalig sa kanya kundi magkaroon ng buhay magpakailanman.
“Hindi nga sinugo ng Diyos sa mundo ang Anak upang hukuman ang mundo kundi upang maligtas ang mundo sa pamamagitan niya.”
Pagninilay
Sa Kapistahan ng Pagtatampok sa Krus na Banal, muli tayong pinaaalalahanan sa kahulugan ng Krus. Ito ang simbolo ng labis-labis at di mababayarang pagmamahal ng Diyos sa sanlibutan. Sa tuwing nakikita natin ang Krus, pinapaalala nito ang dakilang sakripisyo ng Diyos dahil sa Kanyang pagmamahal sa atin. Ang dating tanda o simbolo nang kahihiyan para sa mga Hudyo noon ay naging tanda ng kaligtasan para ating mga Kristiyano na kumikilala kay Jesus bilang Anak ng Diyos. Dalawang salita ang napakahalagang dapat nating tandaan na ipinahayag sa Ebanghelyo: ang mga salitang ito ay ang KAMAHAL (pagmamahal) at IBINIGAY. Minahal tayo ng Diyos, kaya’t ibinigay Niya ang kanyang Bugtong na Anak.
Tunay na hindi lahat ng nagbibigay ay nagmamahal. Pero, lahat ng nagmamahal ay kayang-kayang magbigay. Isang napakahalagang katangian ng isang nagmamahal ay iyong handa siyang magbigay kahit ang pinakamahalaga sa kanya. Marami ang nagbibigay pero alam natin na may pang personal silang hangarin. Nagbibigay sila dahil may kapalit. Nagbibigay sila dahil mayroon silang inaasahang ibabalik sa kanila. Saan tayo sa dalawang ito? Bakit ka nagbibigay? At paano ka magmahal?
© Copyright Pang Araw-Araw 2022