Oktubre 10, 2019

Ebanghelyo: Lucas 11:5-13
Sinabi rin sa kanila ni Jesus: “Ipalagay nating may kaibigan ang isa sa inyo at pinuntahan mo Siya sa hatinggabi at sinabi: ‘Kaibigan, pahiram nga ng tatlong pirasong tinapay dahil kararating lang mula sa biyahe ng isa kong kaibigan at wala akong maihain sa Kanya.’ At sasagutin ka siguro ng nasa loob: ‘Huwag mo na akong gambalain. Nakatrangka na ang pinto at nakahiga na kami ng mga bata; hindi na ako maaaring tumayo para bigyan ka.’ Sinasabi ko sa inyo, kung hindi man Siya bumangon para magbigay dahil sa pakikipagkaibigan, babangon pa rin Siya at ibibigay sa iyo ang lahat mong kailangan dahil sa pagpupumilit sa Kanya. “Kaya sinasabi ko sa inyo: humingi at kayo’y bibigyan, maghanap at matatagpuan ninyo, kumatok at bubuksan ang pinto para sa inyo. Talaga ngang tumatanggap ang humihingi, nakakatagpo ang naghahanap at pinagbubuksan ang kumakatok. “Sino sa inyo ang amang magbibigay ng ahas sa Kanyang anak kung isda at hindi ahas ang hinihingi nito? Sino ang magbibigay ng alakdan kung itlog ang hinihingi? Kaya kung kayo mang masasama’y marunong magbigay ng mabubuting kaloob sa inyong mga anak, gaano pa kaya ang Ama mula sa langit? Tiyak na ibibigay Niya ang banal na Espiritu sa mga hihingi sa Kanya.

Pagninilay
Walang salapi ang makakatumbas sa halaga ng pagsisikap ng isang ama o ng pagsasakripisyo ng isang ina maitaguyod lamang ang kanilang mga anak. Likas sa mga magulang ang maging mapag-aruga. Ang matugunan ang pangangailangan ng kanilang mga anak ang tanging hangarin ng mga magulang. Meron tayong isang Amang nasa langit na naghihintay sa ating tawag. Isang mapagmahal at mapagkalingang Ama ang ating Diyos. Makakaasa tayong diringgin Niya ang ating mga hinaing at mga pangangailangan. Huwag magalinlangang humingi, maghanap at kumatok sa Kanya. Tiyak tayong pagbibigyan, makakasumpong at pagbubuksan.

© Copyright Pang Araw-Araw 2019