Ebanghelyo: Mt 6: 24-34*
Walang makakapagsilbi sa dalawang amo; siguradong kamumuhian ang isa at mamahalin naman ang isa pa, o magiging matapat sa una at mapababayaan ang pangalawa. Hindi kayo makapaglilingkod sa Diyos at sa pera. Kaya sinasabi ko sa inyo: huwag mag-alala sa kakanin at iinumin para sa inyong buhay, o sa idadamit para sa inyong katawan. (…) Tingnan ninyo ang mga ibon sa langit: hindi sila naghahasik ni nagaani, ni nagiipon sa mga bodega, gayunma’y pinakakain sila ng inyong Amang nasa Langit. Di ba’t mas mahalaga kayo kaysa mga ibon? Sino sa inyo ang makapagdadagdag sa kanyang taas sa pagkabahala niya? At bakit kayo mababahala tungkol sa pananamit? Tingnan ninyo ang mga bulaklak sa bukid, sa pagtubo ng mga ito. Hindi sila nagtatrabaho o humahabi. Ngunit sinasabi ko sa inyo na kahit na si Solomon sa kanyang kayamanan ay hindi nakapagbihis gaya ng isa sa kanila. (…) Huwag na kayong mag-alala at magsabi: Ano ang ating kakanin? Ano ang ating iinumin? O, ano ang ating isusuot? Ang mga pagano ang nababahala sa mga bagay na ito; ngunit alam ng inyong Amang nasa Langit na kailangan ninyo ang mga ito. Kaya hanapin muna ninyo ang kaharian at katarungan ng Diyos, at ibibigay rin sa inyo ang lahat ng ito. At huwag alalahanin ang bukas sapagkat bahala ang bukas na mag-alala sa kanyang sarili. Sapat na sa bawat araw ang sariling hirap nito.
Pagninilay
Madiing pinahayag ni Jesus sa mga disipulo na “Hindi maaring maglingkod sa Diyos at sa kayamanan.” Tinanong sila ni Jesus: sino sa dalawang panginoon ang iyong iibigin? Alin ang iyong paglilingkuran? Tinuturo ni Jesus kung paano pumili ng mga pananaw at pagkilos na makapagdadala sa atin sa pinakamahalagang kasiyahan. Ang pagiging alipin sa kayamanan ay malinaw na hindi pinakamahusay na paraan upang maging masaya at mapayapa. Hindi ibig sabihin na masama ang kayamanan, ngunit ang pagiging alipin nito ang nakakasira sa ating kaluluwa. Sa kabilang banda, ang wagas na pagtitiwala sa kapangyarihan at pagmamahal sa Diyos ang susi sa walang-hanggang galak. Kaya tiniyak ni Jesus na walang tayong dapat ikababahala, “Huwag tayong mag-alala dahil alam ng Diyos ang ating mga pangangailangan. Ang hinihiling lang Niya sa atin ay magtiwala at palalimin ang ating pananampalataya.”
© Copyright Pang Araw-Araw 2024