Ebanghelyo: Mt 6: 19-23
Huwag dito sa lupa kayo magipon ng inyong mga iniipon sapagkat dito’y masisira ang mga iyon ng mga kulisap at kalawang, at mananakaw ng magnanakaw. Sa piling ng Diyos kayo mag-ipon ng inyong iniipon; wala nga roong kulisap o kalawang na sisira, at walang magnanakaw. Malaman mo nawa na kung nasaan ang iyong kayamanan, naroon din ang iyong puso. Ang iyong mata ang lampara ng iyong katawan; kung malinaw ang iyong mata, nasa liwanag ang buo mong katawan. Kung malabo naman ang iyong mata, nasa kadiliman ang buo mong katawan. At kung dumilim ang liwanag na nasa iyo, gaano pa kaya ang madilim!
Pagninilay
Sa ebanghelyo, nagbabala si Jesus na huwag magimbak ng kayamanan para sa sarili habang nabubuhay pa rito sa lupa. Ang kayaman sa lupa ay maaaring manakaw, mabulok o mawala. Ang ninanais ni Jesus ay ang mag-imbak tayo ng hindi nabubulok tulad ng kabutihan at pagmamahal ng Diyos sa kapwa. Bakit kaya marami sa atin ang nag-iipon o nagiimbak ng mga bagay-bagay na alam naman nating naglalaho lang din sa huli? Ito ba ay para sa ating kaginhawahan, seguridad, kasiyahan o katayuan? Sa ating kaibuturan, napagtanto natin na ang makalupang kayamanan ay tunay na hindi makapagbibigay sa atin ng tunay na ligaya o katiwasayan, maliban sa Diyos. Ang isang brilyante, isang malaking bahay o isang mamahaling sasakyan ay hindi kailanman maaaring ipalit sa pagmamahal sa atin ni Jesus. Si Jesus mismo ang Yaman na hindi nasisira o hindi nabubulok at nagbabago. Kung matututunan nating angkinin si Jesus bilang ating pinaka-Yaman, hinding-hindi na tayo magiging alipin ng kahit anong karangyaan at kayaman ng mundo.
© Copyright Pang Araw-Araw 2024