Ebanghelyo: Lucas 1:26-38
Sa ikanim na buwan, isinugo ng Diyos ang Anghel Gabriel sa isang bayan ng Galilea na tinatawag na Nazaret. Sinugo ito sa isang birhen na ipinagkasundo na sa isang lalaking nagngangalang Jose mula sa sambahayan ni David; at Maria naman ang pangalan ng birhen. Pumasok ang anghel at sinabi sa kanya: “Matuwa ka, O puspos ng grasya, sumasaiyo ang Panginoon.” Nabagabag naman si Maria dahil sa pananalitang ito at pinagwari kung ano ang pagbating ito. At sinabi ng anghel sa kanya: “Huwag kang matakot, Maria, dahil may magandang niloloob ang Diyos para sa iyo. At ngayo’y maglilihi ka at manganganak ng isang lalaki na pangangalanan mong Jesus. Magiging dakila siya at tatawagin siyang Anak ng Kataas-taasan, at ibibigay sa kanya ng Panginoong Diyos ang trono ng kanyang ninunong si David. Maghahari siya sa angkan ni Jacob magpakailanman; talaga ngang walang katapusan ang kanyang paghahari.” Sinabi ni Maria sa anghel: “Paanong mangyayari ito gayong di ako ginagalaw ng lalaki?” At sumagot sa kanya ang anghel: “Papanaog sa iyo ang Espiritu Santo at lililiman ka ng kapangyarihan ng Kataas-taasan kaya magiging banal ang isisilang at tatawaging Anak ng Diyos. At nagdalantao naman ngayon ang pinsan mong si Elizabeth sa kabila ng kanyang katandaan, at siyang itinuturing na baog ay nasa ikaanim na buwan na. Wala ngang imposible sa Diyos.” Sinabi naman ni Maria: “Narito ang utusan ng Panginoon, mangyari nawa sa akin ang iyong sinabi.” At nilisan siya ng anghel.
Pagninilay
“Mapalad ka sa babaeng lahat.” Pinag-iisipan natin ang sinabi ng anghel kay Maria na siya ay magiging ina ng Anak ng Diyos. Hindi kaagad naunawaan ni Maria ang sinasabi ng anghel. Tila tumutol pa siya. Matapos ang kumpletong paliwanag ng Anghel, naniniwala si Maria at tinanggap ang salita ng Diyos. Tunay na siya’y isang pinagpala sa lahat ng kababaihan. Ang kaligayahan ay isa pang pagsasalin ng pagiging mapalad. Masaya si Maria dahil sa malakas na ugnayan niya sa Ama na pumili sa kanya. Si Jesus na nagiisang anak ay isinilang sa pamamagitan ng kapangyarihan ng Espiritu Santo. Tayong mga tagasunod ni Kristo ay tinatawag din na mapapapalad. Mapalad o masaya tayo kapag nakikinig at tumutugon sa salita ng Diyos sa araw araw. Nawa’y patuloy tayong magsikap na palakasin ang ating pakikipagugnayan sa Ama, sa Anak na si Jesus, at sa Espiritu Santo.
© Copyright Pang Araw-Araw 2021
