Disyembre 08, 2022

Ebanghelyo: Lucas 1:26-38

Sa ikanim na buwan, isinugo ng Diyos ang Anghel Gabriel sa isang bayan ng Galilea na tinatawag na Nazaret. Sinugo ito sa isang birhen na ipinagkasundo na sa isang lalaking nagngangalang Jose mula sa sambahayan ni David; at Maria naman ang pangalan ng birhen.

Pumasok ang anghel at sinabi sa kanya: “Matuwa ka, O puspos ng grasya, sumasaiyo ang Panginoon.” Nabagabag naman si Maria dahil sa pananalitang ito at pinagwari kung ano ang pagbating ito.

At sinabi ng anghel sa kanya: “Huwag kang matakot, Maria, dahil may magandang niloloob ang Diyos para sa iyo. At ngayo’y maglilihi ka at manganganak ng isang lalaki na pangangalanan mong Jesus. Magiging dakila siya at tatawagin siyang Anak ng Kataastaasan, at ibibigay sa kanya ng Panginoong Diyos ang trono ng kanyang ninunong si David. Maghahari siya sa angkan ni Jacob magpakailanman; talaga ngang walang katapusan ang kanyang paghahari.”

Sinabi ni Maria sa anghel: “Paanong mangyayari ito gayong di ako ginagalaw ng lalaki?” At sumagot sa kanya ang anghel: “Papanaog sa iyo ang Espiritu Santo at lililiman ka ng kapangyarihan ng Kataastaasan kaya magiging banal ang isisilang at tatawaging Anak ng Diyos. At nagdalantao naman ngayon ang pinsan mong si Elizabeth sa kabila ng kanyang katandaan, at siyang itinuturing na baog ay nasa ikaanim na buwan na. Wala ngang imposible sa Diyos.”

Sinabi naman ni Maria: “Narito ang utusan ng Panginoon, mangyari nawa sa akin ang iyong sinabi.” At nilisan siya ng anghel.

Pagninilay

Ano kaya ang naramdaman ni Maria nang makita niya ang anghel? Malamang na hindi niya naunawaan ang salita ng anghel. Akalain mo ipanganganak daw niya ang Anak ng Kataastaasan, Anak ng Diyos. Hindi ba namamatay ang nakakakita sa Diyos? Magbubuntis daw siya hindi dahil sa pakikipagtalik sa lalaki kundi gawa ng Espiritu Santo. Siya rin mismo ang magpapangalan sa bata! Sino ang hindi malilito? Sa huli, lumabas ang tunay niyang pagkatao: “Narito ang alipin ng Panginoon, mangyari nawa sa akin ang iyong sinabi.”

Hindi naman kataka-taka na ganito ang naging pagtanggap ni Maria. Ang anghel na rin ang nagsabi na siya ay puspos ng grasya at sumasakanya ang Panginoon. Sa madali’t sabi, hindi magic ang nangyari. Sa pasimula pa lamang ay kumikilos na kay Maria ang Diyos upang ihanda sa sandaling ito. Bawat tao ay ipinapanganak na may kasalanang mana mula kina Adan at Eba. Wala nito si Maria. Ginawa siyang malinis upang maging karapa -dapat na magdalang-tao sa Anak ng Diyos. Yan ang tinatawag na Immaculada Concepcion. Ganyan ka-espesyal si Maria sa mata ng Diyos.

© Copyright Pang Araw-Araw 2022