Ebanghelyo: Marcos 25:14-30
Ipagpalagay natin na may isang tao, na bago mangibang-bayan ay tinawag ang kanyang mga katulong at ipinagkatiwala sa kanila ang kanyang mga ari-arian. Limang talentong pilak ang ibinigay niya sa una, dalawa naman sa isa pa, at isa sa pangatlo, batay sa kaya ng bawat isa. At saka siya umalis.
Agad na ipinagnegosyo ito ng nakatanggap ng limang talento at kumita ng lima pa. Nagnegosyo rin ang nakatanggap ng dalawa at kumita ng dalawa pa. Humukay naman sa lupa ang may isang talento at itinago ang pilak ng kanyang amo.
Pagkaraan ng matagal na panahon, bumalik ang amo ng mga katulong na ito at hiningan sila ng pagsusulit. Kaya lumapit ang nakatanggap ng limang talento dala ang tinubong lima pang bareta, at sinabi: ‘Panginoon, ipinagkatiwala mo ang limang bareta sa akin, at tingnan mo, tumubo pa ako ng limang talento.’ Sumagot ang amo: ‘Mabuti, mabait at matapat na katulong; dahil naging tapat ka sa kaunting bagay, pagkakatiwalaan kita ng higit pa rito. Halika at makibahagi sa kaligayahan ng iyong panginoon.’
Lumapit naman ang may dalawang talento at nagsabi: ‘Panginoon, ipinagkatiwala mo ang dalawang talento sa akin, at ngayo’y tumubo pa ako ng dalawang talento.’ Ang sabi ng amo: ‘Mabuti, mabait at matapat na katulong; dahil naging tapat ka sa kaunting bagay, pagkakatiwalaan kita ng higit pa rito. Halika at makibahagi sa kaligayahan ng iyong panginoon.’
Sa bandang huli, dumating ang nakatanggap ng isang talento at nagsabi: ‘Panginoon, alam kong mahigpit kang tao. Inaani mo ang di mo itinanim at nililikom ang hindi mo ipinagnegosyo. Natakot ako kaya itinago ko ang iyong talento sa lupa. Heto ang sa iyo.’ Ngunit sinagot siya na kanyang amo: ‘Masama at walang kuwentang katulong, alam mo palang inaani ko ang hindi ko itinanim at nililikom ang hindi ko ipinagnegosyo. Sana’y dinala mo sa bangko ang aking pilak at mababawi ko ang sa akin pati na ang tubo pagdating ko.
Kaya kunin ang talento sa kanya at ibigay ito sa may sampu pa. Sapagkat sa sinumang meron, bibigyan pa siya at magkakaroon nang sagana; ngunit ang wala, maging ang sa kanya ay aagawin sa kanya. Para sa walang silbing katulong, itapon siya sa dilim kung saan may iyakan at pagngangalit ng ngipin.’
Pagninilay
Si San Agustin ay isa sa mga kilalang santo dahil sa kaniyang mga sinulat, pangaral at higit sa lahat ay ang kaniyang pagpapanibagong buhay. Mula sa isang mayamang pamilya, namuhay si Agustin sa makamundong paraan. Dahil dito, naging bulag siya sa buhay mananampalataya. Ngunit ang kaniyang pagbabago ay naging radikal – nakaugat sa kaniyang pagkatao. Hindi lamang niya tinalikuran ang makamundong buhay ngunit tinahak niya ang buhay kabanalan. Nawa ang ating pagsunod kay Kristo ay maging radikal din. Hindi lamang ang pagsimba, pakikinig sa salita ng Diyos o paglilingkod sa simbahan ang pagsunod kay Kristo. Ito ay nakaugat sa atin din buhay sa araw-araw. Sa ating pagtalikod sa makamundong buhay, harapin din nawa natin ang buhay kabanalan at matagpuan ang kapanatagan sa piling ng Diyos.
“You have made us for yourself, O Lord, and our heart is restless until it rests in you.” – San Agustin ng Hippo
© Copyright Pang Araw-Araw 2021
