Abril 24, 2023

Ebanghelyo: Juan 6:22-29

Kinabukasan napuna ng mga taong nakatayo sa kabilang ibayo ng dagat na dati’y walang ibang bangka doon kundi isa lang at hindi sumakay sa bangka kasama ng kanyang mga alagad si Jesus kundi ang kanyang mga alagad lamang ang magkakasamang umalis. May iba namang malalaking bangkang galing Tiberias na dumating malapit sa lugar na kinainan nila ng tinapay pagkapagpasalamat ng Panginoon. Kaya nang mapuna ng mga tao na wala roon si Jesus ni ang kanyang mga alagad, sumakay sila sa mga bangka at nagpa-Capernaum sa paghanap kay Jesus.

Nang matagpuan nila siya sa kabilang ibayo ng dagat, sinabi nila sa kanya, “Rabbi, kailan ka dumating?”

Sumagot sa kanila si Jesus at sinabi: “Talagang-talagang sinasabi ko sa inyo, hinahanap n’yo ako hindi dahil sa nakita n’yo sa pamamagitan ng mga tanda kundi dahil sa tinapay na kinain n’yo at nabusog kayo. Magtrabaho kayo, hindi nga para sa pagkaing nasisira kundi para sa pagkaing namamalagi hanggang buhay na magpakailanman. Ito ang ibibigay sa inyo ng Anak ng Tao, siya nga ang tinatakan ng Diyos Ama.”

Kaya sinabi nila sa kanya: “Ano ang matatrabaho namin para maisagawa ang mga gawa ng Diyos?” Sumagot si Jesus at sinabi sa kanila: “Ito ang gawa ng Diyos: patuloy kayong manalig sa sinugo niya.”

Pagninilay

Bakit naghahanap ang mga tao kay Jesus? Dahil ba sa naniniwala sila sa kanya at sa kanyang mensahe? Hinahanap nila si Jesus hindi dahil sa kanilang pananalig sa Kanya kundi dahil sa natugunan ang kanilang pangangailangang pantao. Sa ating mga panalangin, mainam na suriin kung ano ang nilalaman ng ating mga dasal. Minsa’y nagiging listahan ng mga pang-araw araw na pangangailangan ang ating mga dasal sa Panginoon. Hindi naman masama ang humiling sa Diyos ng ating mga kailangan ngunit huwag nating kalimutan na ang pagdarasal ay isang pakikipag-usap sa Diyos. Isa itong pagkakataong mapalalim ang ating pagkakilala at pananampalataya sa Kanya. Sa panalangin, di na natin kai langan pang hanapin ang Panginoon sapagkat lagi siyang handang makinig sa atin. Nais din niyang mapatatag at mapalalim ang ating relasyon sa kanya.

© Copyright Pang Araw-Araw 2023