Abril 15, 2025

Ebanghelyo: Juan 13:21-33, 36-38
Pagkasabi ng mga ito, nabagabag ang kalooban ni Jesus, at nagpatunay: “Talagang-talagang sinasabi ko sa inyo: ipagkakanulo ako ng isa sa inyo.” Nagtinginan ang mga alagad at pinagta-takhan kung sino ang tinutukoy niya. Nakahilig sa tabi ni Jesus ang isa sa kanyang mga alagad, ang mahal ni Jesus. Kaya tinanguan ito ni Simon Pedro para usisain si Jesus kung sino ang kanyang tinutukoy. Kaya paghilig niya sa tabi ni Jesus, sinabi niya sa kanya: “Panginoon, sino ba iyon?” Sumagot si Jesus: “Siya iyong ipagsasawsaw ko ng kapirasong tinapay at siya kong bibigyan.” At pagkasawsaw ng kapirasong tinapay, ibinigay niya iyon kay Judas, anak ni Simon Iskariote. Kasunod ng kapirasong ito, pumasok sa kanya si Satanas. Kaya sinabi sa kanya ni Jesus: “Magmadali ka sa gagawin mo.” Walang nakaunawa sa mga nakahilig sa hapag kung ba’t sinabi niya iyon sa kanya. Dahil nakay ni Judas ang bulsa, inakala ng ilan sa sinasabi sa kanya ni Jesus: “Bumili ka ng mga kailangan natin para sa Piyesta,” o kaya’y mag-abuloy sa mga dukha. Kaya pagkakuha niya sa kapirasong tinapay, agad siyang lumabas. Gabi noon. Pagkalabas ni Judas, sinabi ni Jesus: “Niluwalhati na ngayon ang Anak ng Tao, at niluwalhati rin sa kanya ang Diyos. At agad naman siyang luluwalhatiin ng Diyos sa sarili nito. Mga munting anak, sandali na lamang n’yo akong kasama. Hahanapin ninyo ako at gaya ng sinabi ko sa mga Judio sinasabi ko rin sa inyo ngayon, ‘Kung saan ako papunta, hindi kayo makaparoroon.’ Sinabi sa kanya ni Simon Pedro: “Panginoon, saan ka papunta?” Sumagot si Jesus: “Hindi ka makasusunod ngayon sa akin saan ako papunta; susunod ka pagkatapos.” Winika sa kanya ni Pedro: “Panginoon, bakit hindi ako makasusunod ngayon? Maiaalay ko ang aking buhay alang-alang sa iyo.” Sumagot si Jesus: “Iaalay mo ang buhay mo alang-alang sa akin? Talagang-talagang sinasabi ko sa iyo, hindinghindi titilaok ang tandang hanggang makaitlo mo akong maitatuwa.”

Pagninilay

“Humilig sa Kanyang dibdib.” Naranasan mo na ba ang pagtaksilan ng isang kaibigan? Isa sa pinakamasakit at pinakamapait na karanasan sa buhay ay ang pagtaksilan tayo ng itinuturing nating matalik na kaibigan. Ang pagkakaroon ng tunay na kaibigan ay hindi madali. Hindi ito “instant” tulad ng “add friend” sa ating “Facebook Account.” Ang pagiging magkaibigan ay isang proseso ng pagkilala, paglago sa ugnayan hanggang ganap mong maibigay ang tiwala at pagmamahal. Bilang isa sa labindalawang alagad na personal na tinawag ng Panginoong Jesus, si Judas Escariote ay nakarinig ng kanyang mga turo, nakasama sa kanyang pagpapahayag ng paghahari ng Diyos, at nakasalo nya sa hapag. Siya ay itinuring ni Jesus na hindi alipin kundi kaibigan. Kaya nga ganun na lang ang kanyang kalungkutan at pagkabagabag ng kalooban sa pagkakanulo ng isang kaibigan. Samantala, sa kabila ng pagtataksil ni Judas, payapang nanatili si Juan na nakahilig sa dibdib ni Jesus, tanda ng kanyang puso-sa-pusong ugnayan sa kanya. Ngayong Martes Santo, inaanyayahan tayo ng Panginoon na humilig sa kanyang dibdib at damhin ang tibok ng kanyang puso, upang hindi maging Hudas kundi isang Juan. Sapagkat ang tunay na kaibigan ay may pusosa- pusong ugnayan, hindi mang iiwan, at mananatiling tapat hanggang kamatayan.

© Copyright Pang Araw-araw 2025