Ebanghelyo: Marcos 10:17-27
At nang palakad na siya, isang tao ang patakbong sumalubong sa kanya at paluhod na nagtanong: “Mabuting guro, ano ang dapat kong gawin para magmana ng buhay na walang hanggan?”
Sumagot sa kanya si Jesus: “Bakit mo ako tinatawag na mabuti? Walang mabuti kundi ang Diyos lamang. Alam mo ang mga utos: Huwag papatay, huwag makiapid, huwag magnakaw, huwag manirang-puri sa kapwa, huwag mandaya, igalang ang iyong ama at ina.” Sinabi sa kanya ng tao: “Sinunod ko ang lahat ng ito mula pagkabata, ano pa ang kulang ko?”
Kaya tinitigan siya ni Jesus at minahal siya, at sinabi: “Isa ang kulang sa iyo. Umuwi ka at ipagbili ang lahat ng iyo at ibigay sa mga dukha, at magkakaroon ka ng kayamanan sa Langit. At saka ka bumalik para sumunod sa akin.”
Pinanghinaan ng loob ang tao sa salitang ito at umalis na malungkot sapagkat napakayaman niya.
Kaya tumingin si Jesus sa paligid at sinabi sa kanyang mga alagad: “Napakahirap ngang makapasok ang mga may kayamanan sa kaharian ng Diyos.” Takang-taka nga ang mga alagad dahil sa pananalitang ito. Kaya muling sinabi ni Jesus sa kanila: “Mga anak, napakahirap pumasok sa kaharian ng Diyos! Oo, mas madali pa para sa kamelyo ang lumusot sa butas ng karayom kaysa pumasok ang isang mayaman sa kaharian ng Diyos.”
Lalo pang namangha ang mga alagad at nag-usap-usap: “Kung gayon, sino ang maliligtas?” Tinitigan sila ni Jesus at sinabi: “Imposible ito para sa tao pero hindi para sa Diyos; lahat ay posible para sa Diyos.”
Pagninilay
Mga ilang dekada na ang nakalipas nang sinimulan sa iba’t ibang bansa ang tinatawag natin ngayon na minimalism. Ito’y bilang reaksyon sa consumerism at maiwasan ang lahat ng mga problemang nakaukol sa paghahabol ng mga materyal na bagay. Kakaunti ang mga kagamitan ng mga minimalists; ang prayoridad nila ay ang kasiglahan at ang pag-unlad ng mga personal na ugnayan. Akma rito ang itinuturo ni Jesus sa ebanghelyo. Sa kasaysayan ng Simbahan, marami rin ang nagbigay-saksi sa buhay relihiyoso tungkol sa poverty and asceticism, upang hanapin ang Diyos lamang at ang maglingkod sa kapwa.
Hindi ako nagtataka na pinanghinaan ng loob ang tao nang sinabi ni Jesus na “ipagbili ang lahat ng iyo at ibigay sa mga dukha”. Marami sa atin ang naglaan ng maraming panahon sa paghahanap-buhay upang kumita lamang ng pera, ngunit hindi pala ito mahalaga? Mahalaga naman ito, pero may mas mahalaga pa rito – ang pagsunod kay Jesus. Inakala ng mayaman na hindi na niya kailangan ang tulong na galing sa itaas. Kaya naman, mahihirapan siyang makapasok sa Kaharian. Nawa’y matanto natin na hindi dapat umikot ang buhay natin sa paghahangand ng mga materyal na bagay na lumilipas. Sapat na ang pag-ibig ng Diyos sa buhay natin.
© Copyright Pang Araw-araw 2025
