Ebanghelyo: Lc 12: 13-21
Sinabi kay Jesus ng isa sa karamihan: “Guro, sabihin mo nga sa aking kapatid na hatian ako ng mana.” Ngunit sinabi ni Jesus sa kanya: “Kaibigan, sino ang nagtalaga sa akin bilang hukom o tagapaghati ninyo?” At sinabi niya sa mga tao: “Mag-ingat kayo at iwasan ang bawat uri ng kasakiman sapagkat magkaroon man ng marami ang tao, hindi sa kanyang mga ari-arian nakasalalay ang kanyang buhay.” At idinagdag ni Jesus ang isang talinhaga: “May isang taong mayaman na maraming tinubo sa kanyang lupain. Kaya nag-isip-isip siya: ‘Ano ang gagawin ko? Wala man lang akong mapagtipunan ng aking ani.’ At sinabi niya: ‘Ito ang gagawin ko, gigibain ko ang aking mga bodega at magtatayo ako ng mas malalaki; doon ko titipunin ang lahat kong trigo at ang iba pa. At masasabi ko na sa aking sarili: Kaibigan, marami kang ari-ariang nakalaan para sa maraming taon. Magpahinga ka, kumain, uminom at magsaya.’ Ngunit sinabi sa kanya ng Diyos: ‘Hangal! Sa gabi ring ito, babawiin sa iyo ang iyong buhay. Mapapasakanino na ang i ong inihanda?’ Gayon din ang masasabi sa sinumang nag-iimpok ng yaman para sa kanyang sarili at walang tinutubo para sa Diyos.”
Pagninilay
Tila nakatuon ang halaga ng ating buhay sa yaman ng daigdig na ito. Kaya ganun na lamang ang naging tugon ni Jesus sa hiling na siya’y maging hukom o tagapaghati ng mana. Ang nais ni Jesus ay tayo’y makihati at makasalo sa kaharian ng Diyos. Ang yaman ng Diyos ay ang Kanyang awa at Pagmamahal. Tayo ay inaanyayahan, higit sa lahat, na bigyanghalaga ang kaharian ng Diyos at ang pamumuhay na naaayon sa kanyang kalooban, at ibibigay niya ang lahat ng bagay na ito (Mt. 6:33). Tandaan natin, na ang yaman ng mundo ay pansamantala lamang at darating ang panahon na sila’y mawawala sa ating mga palad. Hindi masama o kasalanan ang maging mayaman o yumaman sa mundong ito, ngunit mas higit na mahalaga na maging mayaman o yumaman tayo sa pananampalataya, pagibig at pag-asa sapagkat ang mga bagay na ito ang makatutulong sa atin upang palaguin ang ating pananampalataya at siyang maaaring maghatid sa atin tuwina sa piling ng Diyos.
© Copyright Pang Araw-araw 2024