Ebanghelyo: Mc 4: 35-41
Kinahapunan ng araw na iyon, sinabi niya sa kanila: “Tumawid tayo sa kabilang ibayo.” Kaya iniwan nila ang mga tao at namangka silang kasama ni Jesus sa bangkang inuupuan niya. At may iba pang mga bangka na kasabay nila. At nagkaroon ng malakas na ipuipo. Hinampas ng mga alon ang bangka at halos lumubog na samantalang tulog siya sa kutson sa hulihan. Kaya ginising nila siya at sinabi: “Guro, halos mamamatay na tayo at balewala sa iyo!” Pagbangon niya, inutusan niya ang hangin at sinabi sa dagat: “Tahimik, huwag kumibo.” Nabawasan ang hangin at nagkaroon ng ganap na kapayapaan. At sinabi niya sa kanila: “Napakatatakot ninyo! Bakit? Wala pa ba kayong paniwala?” Ngunit lalo silang nasindak at nag-usapusap: “Sino ito na pati hangin at dagat ay sumusunod sa kanya?”
Pagninilay
“Napakatatakot ninyo! Bakit? Wala pa ba kayong paniwala?” Ito ang nasabi ni Jesus sa mga disipulo nang sila’y nabalot ng takot at pangamba. Sila ay nagkulang ng tiwala sa kakayahan ni Jesus. Minsan tayo rin ay natatakot sa bagyo, kalamidad at pagsubok na dumarating sa ating buhay. Ngunit ang Panginoon ay laging nakaagapay at batid Niya ang ating pangangailangan. Kailangan lang nating magtiwala sa kapangyarihan ng Diyos. Marahil ay nakakaranas tayo ng ilang mga banta na nagbabadya sa ating buhay. Hindi nangako si Jesus na papatahimikin ang bawat unos na dumarating sa ating buhay. Pero, nangako Siya na hindi Niya tayo iiwan at pababayaan basta magtitiwala lang tayo sa Kanya. Katulad ng mga disipulo, marahil ang ating takot at pangamba ay nag-uugat mula sa kawalan natin ng kakayahang makita ang galaw ng Diyos sa buhay natin. Ipanalangin at hingin natin ang grasya na makilala natin si Jesus ng lubusan sa Kanyang mga nagawa sa ating buhay.
© Copyright Bible Diary 2024