Ebanghelyo: Mt 5: 38-42
Narinig na ninyo na sinabi: Mata sa mata at ngipin sa ngipin. Ngunit sinasabi ko sa inyo: Huwag ninyong labanan ng masama ang masama. Kung sampalin ka sa kanang pisngi, ibaling ang mukha at iharap ang kabilang pisngi. Kung may magdemanda sa iyo para kunin ang iyong sando, ibigay mo pati ang iyong kamiseta. Kung may pumilit sa iyong sumama sa kanya nang isang kilometro, dalawang kilometro ang lakarin mong kasama niya. Bigyan ang nanghihingi at huwag talikuran ang may hinihiram sa iyo.
Pagninilay
Sa araw-araw, marami tayong nakakasalamuha na iba’t ibang tao na may di magkakatulad na personalidad, ugali, kahinaan at kakayanan. Ang kawalan ng pagtanggap natin sa pagkakaiba-iba ng bawat isa ang siyang sanhi ng hindi pagkakaunawaan. Ito’y kadalasang humahantong sa sakitan ng damdamin at sigalot. Hindi na ito bago lipunang ating ginagalawan. Kaya patuloy tayong hinihikayat ng Panginoong Jesukristo na magpatawad at magbahagi ng pagmamahal, sa halip na magtanim ng sama ng loob at poot sa kapwa. Ipinapamalas din nito ang ating kababaang loob. Sa Ebanghelyo, ipinamumulat ni Jesus kung paano magmahal ang Diyos, na taliwas sa kung paano magmahal ang tao. Ito ang hamon ni Jesus sa atin, ang tanggapin ang pagkakaiba natin sa ating kapwa at matutong magparaya. Sa ganoon makakamtan natin ang kapayapaan. Isabuhay natin ang turo ni Jesus na, “Huwag ninyong labanan ng masama ang masama.” Sa halip, ibahagi natin and pag-ibig at kapayapaan sa kapwa.
© Copyright Pang Araw-Araw 2024