Abril 21, 2023

Ebanghelyo: Juan 6:1-15

Pagkatapos nito, nagpunta si Jesus sa kabilang ibayo ng dagat ng Galilea sa may Tiberias. Sinusundan siya ng makapal na tao dahil napansin nila ang mga tandang ginagawa niya sa mga maysakit. Umahon si Jesus sa bundok at naupo siya roon kasama ang kanyang mga alagad. Malapit na ang Paskuwa na piyesta ng mga Judio.

Kaya pagkatunghay ni Jesus at pagkakita niyang marami ang taong pumupunta sa kanya, sinabi niya kay Felipe: “Saan kayo makabibili ng tinapay para makakain ang mga ito?” Sinabi niya ito bilang pagsubok sa kanya dahil alam na niya kung ano ang napipinto niyang gawin. Sumagot sa kanya si Felipe: “Dalawandaang denaryong tinapay ay hindi sapat sa kanila para makakuha ng tigkakaunti ang bawat isa.”

At sinabi naman sa kanya ng isa sa kanyang mga alagad na si Andres na kapatid ni Simon Pedro: “May maliit na bata rito na may limang tinapay na sebada at dalawang isda. Ano ito para sa pagkarami-raming tao?”

Madamo sa lugar na iyon kaya sinabi ni Jesus: “Paupuin n’yo ang mga tao.” Kaya nag-upuan sila, halos limanlibo ang mga lalaki.

Kaya kinuha ni Jesus ang mga tinapay at pagkapagpasalamat, at ipinabigay sa mga nakaupo. Gayundin naman sa mga isda – gaano man ang gustuhin nila. Nang busog na sila, sinabi niya sa kanyang mga alagad: “Tipunin ninyo ang natirang mga piraso para walang masayang.” Kaya tinipon nila ang mga tira ng mga pinakain, at labindalawang bakol ang napuno ng mga pira-piraso mula sa limang tinapay na sebada.

Pagkakita sa tandang ginawa ni Jesus, sinabi ng mga tao: “Ito ngang talaga ang Propeta parating sa mundo.” At alam ni Jesus na parating sila upang agawin siya para gawing hari kaya lumigpit siyang muli na siya lamang mag-isa sa bulubundukin.

Pagninilay

Hindi hahayaan ng isang mabuting pastol na magutom ang kanyang kawan. Batid ni Jesus ang pangangailangan ng mga taong sumunod sa kanya. Kahit pa buong araw siyang naglilingkod sa kanila sa paggawa ng himala at pagpapagaling ng maysakit, hindi hinayaang pauwiin silang nagugutom. Mula sa limang isda at dalawang tinapay, nakakain ang limang libong tao at may sumobra pang labindalawang basket. Ang pangyayaring ito ay nakatuon kay Jesus, ang Tinapay ng Buhay, na ating ginugunita sa paghahati-hati at pakikibahagi ng tinapay sa Eukaristiya. Sa pagtanggap natin sa katawan ni Kristo sa Eukaristiya, nagiging bahagi tayo ng kanyang katawan. Muli tayong hinihimok na magbahagi ng ating sarili sa kapwa upang ang lahat ay mabusog sa biyaya ng Diyos at sa ati’y walang magkukulang.

© Copyright Pang Araw-Araw 2023