Ebanghelyo: Lucas 7:11-17
Pagkatapos ay pumunta naman si Jesus sa isang bayang tinatawag na Nain at sinamahan siya ng kanyang mga alagad kasama ang maraming tao. Habang papalapit siya sa pintuan ng bayan, tamang-tama namang inilalabas ang isang patay ang nag-iisang anak na lalaki ng kanyang ina, at ito’y isang biyuda kaya sinamahan siya ng dikakaunting tao mula sa bayan.
Pagkakita sa kanya, nahabag sa kanya ang Panginooon at sinabi: “Huwag ka nang umiyak.” Lumapit siya at hinipo ang kabaong; tumigil naman ang mga maydala.
At sinabi niya: “Binata, iniuutos ko sa iyo, bumangon ka!” Umupo nga ang patay at nagsimulang magsalita; at ibinigay siya ni Jesus sa kanyang ina. Nasindak ang lahat at nagpuri sa Diyos, at sinabi: “Lumitaw sa atin ang isang dakilang propeta at dinalaw ng Diyos ang kanyang bayan.” Kayat kumalat ang balitang ito tungkol sa kanya sa buong lupain ng mga Judio at sa lahat ng karatig na lupain.
Pagninilay
Ang tagpong nakita ni Jesus na paglilibing sa anak ng isang biyuda ay nagpaalala kay Jesus nang mga bagay na mangyayari din sa Kanya at sa Kanyang Ina na si Maria. Kaya batid at nauunawaan Niya ang pagdadalamhati ng ina sa pagkawala ng kanyang anak. Dahil sa habag, binuhay ni Jesus ang anak at ibinalik sa kanyang ina. Sinabi niya, “Binata, inuutos ko sa iyo, bumangon ka!” Kahit patay na ito ay muling nabuhay sa utos lang ni Jesus.
Isang bagay na maganda ring pagnilayan at balikan ay ang ating mga relasyon o ugnayan. Bilang ina o ama sa inyong mga anak at bilang anak sa ating mga ina at ama. Marami sa atin ang sugatan, wasak ang mga ugnayan sa isa’t isa, halos patay na at wala ng pag-asa pang mabuhay. Subali’t walang imposible sa Diyos. Kung matututo lang tayong makinig sa ipinag-uutos niya, manunumbalik ang dating sigla ng ating mga samahan. Mahirap mag-isa at batid ito ni Jesus. Huwag nating naising magkahiwa-hiwalay – piliin nating magsama-sama. Napakaikli lang nang panahon natin sa mundo. Binibigyan tayo ng isa pang pagkakataon ni Jesus na “bumangon” at magbalik sa isa’t isa. Hindi pa huli ang lahat.
© Copyright Pang Araw-Araw 2022